الالحاد ... موضة هذا العصر

بسم الله الرحمن الرحيم 
لاحظت في الفترة الاخيرة انتشار ظاهرة الالحاد و بقوة 
كثير من الشباب الان توجه الى الالحاد .. الكفر بالاديان كلها ... الايمان بانه لا إله .. و فقط !! 
 على قدر ما تثير هذه الفكرة في نفسي السخرية و الاشمئزاز معا ! 

أن تولد مسلما .. ثم عندما تكبر و تزعم انك قد اعملت عقلك في الدين و الدنيا لتكتشف في النهاية ان هذا الكون لا اله له .. و ان كل ما فيه ما هو الا محض صدفة بحتة !!! حقا يالك من عبقري !

مش هتناقش هنا عن  صحة معتقدك من عدمه و احاول اثبتلك و جود اله و الكلام ده ... 

هتكلم عن  الي و صلنا للظاهرة دي 
اعتقد اول سبب اننا اتولدنا مسلمين  .. فافتكرنا اننا كده مسلمين بقى و متعلمناش اي حاجة عن يننا غير الي خدناه في كتاب الدين ! .. و يا ريتن اتعلمناه 
فبقى سهل على اي واحد مريض يجي يشكك في معتقدك و يزرغلك كمية شبهات متردش عليها و يظهرلك ان هو البوب الي شغل دماغه و فكر وانت الي ماشي زي الخروف بتقلد اهلك لانهم مسلمين و مشغلتش دماغك و ان الالحاد هو النتيجة الطبيعية لاي حد بيشغل دماغه ! 
منطق شيطاني يجتمع مع انسان جاهل و مريض فيؤدي الى نتائج كارثية 


ثاني سبب الخطاب الديني السيء الذي يتحمل جزء كبير من وزر الملحدين في الايام دي وصلولهم اسلام مش هو الاسلام ... بتصرفاتهم و بكلامهم ,, و اعلام عقيم بيركزلك عليه و يقولك بص الاسلاميين ,,, انت جاهل مش فاهم حاجة فتقوم تنفر من الاسلام  


ثالث سبب  رد الفعل مع واحد بمجرد ما  تعرف انه الحد ,,, الناس بتطلع اسوا ما عندها في وشه حمية لدين ربنا ...   و طبعا ده لا يزيده الا قناعة فوق قناعته ان ده مش دين ربنا اكيد 

في نظري مشكلة الملحد انه تعلق بالدنيا تعلق تام .. الانسان بمجرد ما يفقد الايمان بالاخرة و بالبعث و الحساب معتقدش ان اي دين في الدنيا هيقدر يعمله حاجة ,, خلاص الدنيا سيطرت على تفكيره كله و كل ما هو ليس منطقي في حسابات الدنيا ايمانك بالاخرة و بوجود رب عادل سيحاسب كلٌ على خطأه بيخليك تقول ان مفيش عدل و مفيش رحمة و بالتالي مفيش ربنا 
و لما تيجي تتكلم مع واحد من دول عن الاخرة بتحس من كلامه منطق انه مش هيشتري سمك في مية زي ما بيقولو ... ازاي اؤمن بالاخرة و انا مشفتهاش ... و ده دليل اقوى على ان الدنيا سيطرت على كل تفكيره ففقد من حياته المعاني الحسية و الروحية الي بدونها الانسان بيتحول اقرب الى  الة ! 

حقيقي انا مش عارف ازاي حد قرأ القرآن الكريم و وصل في الاخر ان مفيش إله ! 
كلام زي ده بمجرد ما تعتقد انه مش جاي من عند اله و انه الي مالفه بشر فانت انسان مريض نفسيا  ! 
مش عارف ازاي واحد يقرأ في سيرة النبي محمد عليه الصلاة و السلام و يرفض دعوته 

و هنا يظهر التجلي الحقيقي للاية القرانية " خَتَمَ اللّهُ عَلَى قُلُوبِهمْ وَعَلَى سَمْعِهِمْوَعَلَى أَبْصَارِهِمْ غِشَاوَةٌ وَلَهُمْ عَذَابٌ عظِيمٌ " 

و هنتقل لنقطة تانية و هي حديث النبي عليه الصلاة و السلام " إن الله يبعث على رأس كل مائة سنة من يجدد لها دينها " 

تامل في هذا الحديث في توقيته مع نظرة سريعة للتاريخ تجد بالفعل ان الامة مع كل مئة عام تتغير احوالها تغيرا  كبيرا .. و تصل  الى مرحلة ما من البعد عن دين الله 

و اعتقد المرحلة الي احنا فيها دي مرحلة غير مسبوقة .. الي وصلت ان الناس بقت بتطعن في دين ربنا علانية و بكل بجاحة و للاسف لا تجد من يرد عنه 

بالاضافة الى ان المسلمين اصبحوا لا يحملون من الاسلام الا اسمه فقط (الا من رحم ربي ) و اصبح حديث الشيوخ و العلماء غير مقبول  

كل و احد بقى ماشي بدماغه .. شايف ان هو الوحيد الي صح ... ليه اسمع كلام حد لما ممكن اشغل دماغي .!؟ .. منطق جميل طبعا و بيرضي  الغرور البشري و يحسسك انك جامد و ليك لازمة في  الحياة 

بالاضافة الى بعض العبارات التي تعبر عن انك جامد جمودية التنين لانك ماشي في طريق لوحدك و الدنيا كلها بتحاربك ..و و ده معناه انك عالصح و استمر ... 

مع بعض السفسطة المطلوبة بشده عشان تعجز اي واحد  بتناقشه من انه يرد على اسئلة انت نفسك عارف انها مالهاش اجابة 

تامل أخر في معنى كلمة " يجدد " في حد ذاتها في الحديث ... سالت نفسي مرة ليه النبي مقالش  " من يُحيِي لها دينها " ؟ 
و لقيت ان اول حاجة مينفعش يحيى لان الاسلام مينفعش يموت في فترة من الزمان ... لان سيدنا محمد هو النبي الخاتم  و استمرار رسالة ربنا  و دينه حتى يومنا هذا من اكبر دلائل نبوته 
بالاضافة لان كلمة يجدد تؤكد ادراك النبي لما يحمله تغير الازمنة من تغير في المعتقدات و المفاهيم و الظروف و نمط الحياة و خلافه 
و لذا لزم التجديد ليكون الاسلام موااكب لكل زمان و مكان ... فياتي هذا المجدد ليجدد الدين الاسلامي ليناسب العصر الجديد بما لا يضر بثوابت و اسس و قواعد الدين و العقيدة الاسلامية 

الي عايز يعرف يعني ايه مجدد ممكن يقرأ عن أبي حامد الغزالي و الفترة الزمنية التي وجد فيها و يقرا في كتباته و ازاي ساهمت في احياء الدين مرة اخرى  

و لسه بتسائل يا ترى مين مجدد هذ العصر ,, و يا ترى هيقدر على البلاء الكبير الي احنا فيه ده و لا لأ ... 

و كل ما افتكر حديث النبي الي معناه  ان الساعه لا تقوم الا على شرار الناس حتى ان الرجل ياتي بالفاحشة في الطريق ..  
بخاف  جداا ... القاريء لشروط الساعه الصغرى و الكبرى يعرف انها قربت قوي ... و كثرة الجهل ده مذكور في احاديث النبي ... و هينتهي بان ربنا هيرفع القرأن من الارض فمش هيكون موجود في المصاحف و لا حتى في صدور القراء 

و كثرة القتل الي عندنا دي برده مذكورة في علامات الساعه 

باختصار وجود الملحدين و انتشارهم بهذه الصورة مزادنيش الا يقين في ديني ... لو الناس دي متوجدتش و دعت للي بتدعو ليه بقوة مكنتش هتفهم يعني ايه لا تقوم الساعه الا على شرار الناس 
و مكنتش هتفهم يعني ايه يجدد لها دينها 
و مكنتش هتفهم يعني ايه ختم الله على قلوبهم و سمعهم و ابصارهم 
ربنا لازم يوجد الضد عشان يزيد يقين المؤمنين بيه  
ربنا قال في سورة المدثر 

" وَمَا جَعَلْنَا أَصْحَابَ النَّارِ إِلاَّ مَلائِكَةً وَمَا جَعَلْنَا عِدَّتَهُمْ إِلاَّ فِتْنَةً لِّلَّذِينَ كَفَرُوا لِيَسْتَيْقِنَ الَّذِينَ أُوتُوا الْكِتَابَ وَيَزْدَادَ الَّذِينَ آمَنُوا إِيمَانًا وَلا يَرْتَابَ الَّذِينَ أُوتُوا الْكِتَابَ وَالْمُؤْمِنُونَ وَلِيَقُولَ الَّذِينَ فِي قُلُوبِهِم مَّرَضٌ وَالْكَافِرُونَ مَاذَا أَرَادَ اللَّهُ بِهَذَا مَثَلا كَذَلِكَ يُضِلُّ اللَّهُ مَن يَشَاء وَيَهْدِي مَن يَشَاء وَمَا يَعْلَمُ جُنُودَ رَبِّكَ إِلاَّ هُوَ وَمَا هِيَ إِلاَّ ذِكْرَى لِلْبَشَرِ " 
و هسيبكم بقى تتأملوا في الاية :) 

هختم كلامي باني اوضح بس اننا محتاجين نتعلم ديينا ,, وبقوة ,, عشان نقدر نقاوم الظاهرة دي و نتغلب عليه ,, , تحاول تدعي لدين ربنا على قد ما تقدر .. ادعى المسلمين لدين ربنا  عشان يفهموه و يعرفوا انه الحق و خد ثوابهم 
و ادعي للملحدين دول بالهداية و التوفيق لطريق ربنا 
و تذكر دائما " ان دعوة المسلمين للإسلام .. اصعب بكثير من دعوة غير المسلمين للإسلام "  :)