الهام الذات اصعب من الهام الاخرين

تدوينة قريتها لدكتور نادية العوضي و عجبتني جدا جدا,, بتمس فيها واقع اعتقد بيقرب علينا كلنا ,,
حطيتها هنا عشان لما احتاجها في اي وقت اقدر ارجعلها ,,
عشان كل شوية افتحها افكر فيها ,,
دكتور نادية بتدون من زمان جدا من 2010 تقريبا او قبل كده كمان بس اغلب تدويناتها كانت بالانجليزي
 واخيرا قررت تفتح مدونة عربي بس ,, و تكتب فيها و الصراجه متالقة و ومواضيعها مميزة ,, انصحكم بمتابعتها

السهل جدا أن الواحد يلهم الآخرين بشوية كلمات برّاقة.  

من الصعب جدا أن الواحد يلهم نفسه وهو بيواجه صعوبات واقع الحياة اليومية وتذبذبات العواطف اللي بتحصل معانا كلنا.

كل دي بتحصلي على طول. حالتي النفسية بتبقى عاملة زي المرجيحة. ساعة نشيطة وسعيدة وساعة مافيش نشاط وحاسة بكآبة بسبب ظروف شخصية أو أحداث مصرية / عربية / عالمية.

 الحاجة اللي لازم تتعمل لازم تتعمل. الحياة مش موجودة عشان تبقى سهلة. والشغل شغل. مافيش مفر منه. ماليش أي نفس أنزل أجري بكره. لكن انا من زمان مقررة أن الرياضة لا بد أن تكون جزء لا يتجزأ من حياتي…زي الأكل…زي الشرب…زي الشغل. فمع أني وراي شغل متنتل لازم حيتعمل…مع أني ماليش نفس تماما أتريض…مع أني بأكره الجري بالذات دوناً عن الكثير من الرياضات الأخرى…مع أني حاسة أني منهكة…مع أني نفسيتي الصراحة مش ولا بد انهارده عشان متابعاتي لما يحدث في غزة وبسبب سفر ابنتي بعد يومين…إلا أني لازم حأنزل أجري بكره ان شاء الله. أنا قررت أخلي الرياضة جزء من حياتي يبقى حأخليها جزء من حياتي. قررت أني أتقن رياضة الجري التي لا أكاد أطيقها يبقى حأحاول قد ما أقدر أني أتقن رياضة الجري. نفسيتي زبالة؟ طز. استحملي واستجدعي. ده شوية مجهود عضلي وانت عارفة أنها في مصلحتك.

ده مش معناه أني ما بأديش لنفسي أجازة ما بين الحين والآخر. بنصوم وبعدين بنعيّد. بنشتغل خمسة أيام وبعدين بناخد أجازة يومين. نفس الشيء بالنسبة للرياضة. بنعمل لنفسنا جدول حسب امكاناتنا وحسب أهدافنا وبنتريض حبة ونريح جسمنا حبة.

مش بس كده..الانسان لازم يبقى فاهم نفسه كويس. لازم يبقى عارف امتى يدي لنفسه أجازة نفسية لما بيكون متضايق وازاي ياخد الأجازة النفسية دي. لكن كمان لازم يعرف يحدد لنفسه انه لما ياخد أجازة نفسية يوم يخليها يوم مش كل يوم. ولازم يعرف ازاي يخلي الأجازة النفسية دي تجدد نشاطه مش تمدد فترة الخمول.

حاجات كثيرة جدا في حياتنا بتعتبر جهاد للنفس. لما بأؤمن بدين معين بأجاهد نفسي كل يوم – مهما كنت عاشقة لهذا الدين – عشان أتبع تعليماته. لما بنخلف ولاد بنجاهد نفسنا كل يوم عشان نقوم من السرير في وقت مبكر عشان نصحيهم يروحوا المدارس ونجهز لهم فطارهم …بنجاهد نفسنا رغم عشقنا للولاد دول. مافيش حاجة سهلة.

لو عايز تغير حياتك حتجاهد نفسك رغم الصعوبات…ورغم الحالات النفسية المتأرجحة.

إلهام الآخرين سهل. إلهام نفسك صعب جدا جدا جدا. دوّر جواك..جواك أوي…على مصدر إلهامك. افتكر أسباب قراراتك. لو انت عارف أولوياتك أيه في الحياة حتعمل المستحيل عشان تحققها مهما حصل. مهما حصل

منقول بتصرف ,, 

رابط التدوينة الاصلية كاملة 

http://nadiael3awady.wordpress.com/2014/07/31/inspire-yourself/

حكيَ ..

- النهارده اتفاجات ان رمضان فات منه 17 يوم 
وانا معملتش اي حاجة ,, بمعنى اي حاجة ,, صفر ,, بمعنى صفر ,,, 
كنت مستني رمضان ده من زمان ,, و كنت بحاول استعدله كويس ,, بس معرفش عامة ايه الي حصل ضيعه كده 
عندي استعداد اتقبل اي حاجة و افضل احاول ,, مبيخوفنيش غير ان ربنا يكون نظر لي في مرة كنت بعصاه فيها و ختم على قلبي ....

- مش عارف ليه برتاح لما باجي هنا ,, و اكتب هنا ,,, بقيت بكره الفيس بوك ,, و بعتبره شغل ,, بستخدمه لغرض ما ,, و بحاول اتخلص من سيطرته عليا باي طريقة ,, ادعولي 

-  عارف انت الجندي المجهول ؟؟ .... في جندي مجهول أكتر منه ..!

- زي النهارده من سنة فقدت صديقي أحمد السيد 
اول من أفجع في فقدانه من أصدقائي 
لسه فاكر احساسي ساعتها كانه امبارح ,,و ازاي كنت مدايق من نفسي و ان حالي وصل لايه و هو وصل لايه
ساعتها قررت اني هكون انسان احسن ,, و هتغير ,, مش هتعدي السنة دي غير و انا  انسان جديد,,
المهم ان السنة عدت و انا لسه زي مانا ..!!! 
معلش يا أحمد انا اسف ... اوعدك هحاول تاني و الله ,,, بس انت ادعيلي 

زي بكرة من سنة برده كان اول جنازة امشي فيها لصديق ,, مقرب ... احساس ربنا ميوريه لاي حد ,, 
انا فاكر اني بكيت اليوم ده كما لم أبك من قبل ,,, عيطت كتير ,,, كتير قوي ... مكنتش مهتم مين بيبص عليا و يعرفني او ميعرفنيش,,, مش فاكر غير ان احمد اللق جه عليا و انا ماشي في الجنازة و طبطب عليا و مشى ,, ساعتها انا قعدت اعيط أكتر ,,,, 
ايه لازمة الكلام ده دلوقتي ؟؟,,, معرفش و الله 


- بمناسبة البكاء ,, من اللحظات الي كان نفسي اعيط فيها و معرفتش كان يوم مناقشة هاني و مصطفى و عبد الهادي ,, و هما طالعين بالبدل بعد ما احتفلنا بيهم يركبو عربية الترحيلات عشان يرجعو السجن ,, ساعتها انا حسيت اني هفرقع فعلا من العياط ,, بس مفيش دمعه واحده نزلت ,,, معرفش دي حاجة حلوة ولا وحشة ,, بس حمدت ربنا اني معيطتش يومها ,,,,  لاسباب كتيرة قوي ..


- مشكلتي دايما معايا هي قلبي ,, قلبي مش ئلبي,,, هتفرق و الله و انت بتقراها حتى :D ... 
المهم ,,, ان دي مشكلة كبيرة جدااا بدون الدخول في تفاصيل ,,, فادعيلي ربنا يهديني و يحميني من نفسي و يردني اليه مردا جميلا ,,, 


- الزحمة دي مشكلة كبيرة قوي ,, تسارع الاحداث حواليك ,, مش بيديك اي فرصة انك تفكر في واحد منهم ,, 
يعني انا  في سنة واحده مر عليا كمية احداث و تجارب متوقعتش في حياتي اني امر بيها ,,, 
اخر اسبوع ده ,, انا مريت بحاجات ,, من كتر زحمتها مش قادر اوقف لحظة عشان افكر في كل واحد منهم على حده
طب و ايه لازمة التفكير ,, منا هتعب لو فكرت فيهم ,,,,, بس انا مبعرفش اعدي حاجة من غير ما افكر فيها ,, و افكر حصلت ليه كمان 

- النهارده الشيخ مصطفى درويش كان بيقرا في التراويح  و قرأ الاية دي

وَتَوَكَّلْ عَلَى الْحَيِّ الَّذِي لَا يَمُوتُ وَسَبِّحْ بِحَمْدِهِ وَكَفَى بِهِ بِذُنُوبِ عِبَادِهِ خَبِيرًا} 
   
 هو غلط فيها و عادها أكثر من مرة ,, بس يمكن كانت فرصة هايلة ان الواحد يفكر فيها شوية ,, و كفى به بذنوب عباده خبيرا ,,, ربنا بيقولنا كفاية اني عارف ذنوبكم كلها ,,, تخيل !! 
يعني ربنا عارف كل واحد في الحياة دي بيذنب ايه ,, و بيعصاه ازاي ,, و بيشوفه كمان و هو بيعصاه ,,
هو خبير بكل ده ,, مش عليم ,,, يعني عارف انت بتعصاه ليه كمان ,, و عارف مين هيتوب و مين لأ ,,, و عارف مين الي بيعصاه و هو ندمان و مين الي بيعصاه و هو عادي يعني ,,,, فكرت فيها ثانية كده و قت فعلا و الله ,,, كفى يا رب ,,,

- السنة دي كنت ناوي مختمش القرآن غير ختمة واحده ,, اقراها بتدبر ,, , الجزء هجيبه في ساعة او اثنين او ثلاثة ,, زي ما ياخد ,, المهم معديش كلمة غير لما افكر فيها ,,, بدات كويس ,, بس عدى 17 يوم و انا مقريتش غير 5 اجزاء بس ,, و منتفعتش بيهم كلهم كمان ,, بس طلعت تجربة مرهقة و متعبة ,,, انا بقيت بتعب لما بفكر ,,, ده بجد مش افيه المرة دي !! 

بقول كفاية كده النهارده ,,, لو حد عنده اي تعليق عالكلام ده يا ريت يشاركني  بيه :) 

-