عزلت

للمتابعين " ان كان قد بقي منهم أحد "
احيطكم علما باني قد انتقلت الى منصة تمبلر :D  tumblr
فان كان منكم من يرغب في ان يستمر في متابعة شيء من الهراء الذي اكتبه :D
فهاكم رابط المدونة

https://www.tumblr.com/blog/belalbebo

تحياتي

عن ربنا ...

عن ربنا ... تدوينة مؤجلة من زمن ,, 

" ماشي بنور الله .... بدعي و اقول يا رب " تلك الكلمات التي تغنى بها الشيخ النقشبندي في ابتهاله الشهير ... احسها افضل ما يصف حالي ,,, و يعبر عني ,, 
فانا يا عزيزي شخص " ماشي بنور الله " ,,غارق في نعم الله وفضله و كرمه وجزيل عطائه ,,,, 
ربٌ عظيم ٌ كبير ٌ طالما فاجئنا بكرمه ,,, و جوده ... و رحمته ,,, 
عندما اصل الى اقصى درجات القنوط و اليأس ,,, اجد انفراجة من حيث لا تحتسب ,, احس بتلك اليد الربانية ,, تربت على كتفي و تقول لا تحزن ان الله معنا . 

دائما ما اجد منح لم تكن في حسابي ,, و لم تكن تخطر في احلى احلامي و افضلها ,, 
مهما انفقت من وقت و مجهود في الترتيب و الاعداد ,,, أجد دائما ما قدره الله افضل بكثير مما خططته لنفسي ! و هو شيء عجيب أصلا اني اشك في هذا ,, و لكنها دنيا ملعونة ,, تلهي المرء بالانشغال فيها ,,, و تشعره انه يملك امره و هو في حقيقة الامر  ليس له من الامر شيء 
فعلى سبيل المثال لا الحصر ,,, 
ان احصل على عمل او و ظيفة ,, بحثت كثيرا ,,, و كان أقصى طموحي ان اصل لوظيفة في مستوى معين ,, يكفيني احتياجاتي الشخصية ,, و أكتسب منه خبرة تساعدني في الانتقال لمكان أفضل 
و كانت المفاجاة ,, هي قبولي في فرصة لم اكن احلم بها او اتوقع اصلا ان انافس على القبول فيها ,, في شركة عالمية ,,, ترعاك و تساعدك ,, هدفهم ان يساعدوك ان ترتقي في حياتك المهنية ,, سيوفرون لك كل الخبرات و سيذللون لك كل العوائق في سبيل ان تتعلم بصدق ,,, 
فيالكرم الله و يالفضله ,, حتى الان يعجز لساني عن شكره حق شكره ,, 

و شهادة الاعفاء النهائية من اداء الخدم ة العسكرية ,, ايضا لم احصل عليها الا بكرم الله و رحمته ,, فوالله الذي لا اله الا هو ,, حتى الان لم يسجل اي ميزان نفس الطول و الوزن الذين سجلهما ميزان الجيش و بناء عليهما تم استبعادي 
و لو أن واحد منهما فقط ( الطول او الوزن ) تم قرائتها بطريقة صحيحة لكنت الان أقضى فترة خدمتي في احدى المعسكرات ! 
فيالكرم الله 

و أيضا ,, فرحتي بخروج هاني و مصطفى التي لم تكن  على البال او الخاطر 
مفاجاة و ما احلاها من مفاجاة  فبعد أن يأست كل الحسابات المنطقية ,, فهاني و مصطفى حصلو على 45 يوم في اخر تجديد  و سيصادف معاد الجلسة القادمة دائرة من اسوا دوائر الاسماعيلية ,, و سوف يحصلون على 45 يوم أخرى و بالتالي لا فرصة لخروجهم قبل 90 يوم و انا لله و انا اليه راجعون ( و هو ما قد حدث بالفعل مع بقية المعتقلين معهم في نفس المحضر ) 
فوجئت بمكالمة من والد هاني و صوته يأتي متهدجا من شدة البكاء ,, يخبرني ان هاني و مصطفى قد حصلا على اخلاء سبيل بقرار من النائب العام ,, لن يمكنك ان تتخيل يا عزيزي كيف كنت أشعر حينها ,, حينما تضرب القدرة الالهية كل الحسابات المنطقية في مقتل ,,, فقط ليعيدك ربك الى تلك الحقيقة التي ما تنفك تغيب عن ذهنك ,, انه هو مدبر الامر ,,, هو المقدر ,, هو الذي يقول للشيء كن فيكون ,, فكل ترتيب لا يضع الله في حساباته ترتيب منقوص يقف على حافة الهاوية ,, فهو محض افتراضات !

و ايضا في نفس السياق ,, كان من المتوقع ان يخرج هاني و مصطفى في يوم الخميس من نفس الاسبوع الذي تلقيت فيه الخبر ,, و كنت سعيد بذلك الخبر سعادة جمة ,, لا توصف 
و عندما حصلت بعض المشكلات ,, شعرت ببعض الحزن لاني لن استطيع ان اكون اول من  يستقبل هاني ومصطفى لحظة  خروجهم  و تشاء الاقدار كالعادة , ان يخرج هاني و مصطفى في يوم الخميس من الاسبوع التالي ,,, و استطيع ان اكون من اوائل المستقبلين كما تمنيت ,, فاللهم لك الحمد و الشكر 


كل هذه المواقف ,, هي محض كرم من الله و فضل ,, ليس لي فيها شيء ,, و لا ادعي الصلاح و لا التقوى و لا الكرامات ,, 
فوالله الذي لا اله الا هو ,, لو علمتم ما في من معاصي و ذنوب و اثام لما طاق احدكم ان يجالسني او يخاطبني او يصافحني او ينظر في وجهي حتى ,, 
و هذا هو طبع البشر ,, فالحمد لله ,, على انه هو الله ,,, الرحيم الكريم ,, الحليم ,, الكريم ,, الكريم ,, الكريم ,, 

اللهم اعنا على ذكرك و شكرك و حسن عبادتك 

عن الحب ...

" عن العشاق .. سألوني ,, و انا في العشق لا أفهم ,,"

في كلامٍ عن الحب ,,, و طرح لكثير مما يدور في البال ,, 
فبدأ من السؤال الابرز ,, و الاكثر تداولا بأقلام الادباء ,, " ما هو الحب ؟ "  
و لم يتفق اثنان على تعريف واحد له حتى الان ,, ,و ربما يكون هذا من الاعجاز ,,, 
يمكني ان اقول من رأيي ان الحب هو شعور بالانجذاب و الاعجاب تجاه شخص معين ,,, 

وهنا نأتي لما يتم ترويجه ,,, من هذا الحب الافلاطوني السقراطي الخيالي  
قصص الحب العنيفة ,,  خيال الكتاب المريض ,,, عدسة المصور السقيمة ..  الذي يتناول الحب بصورة متخلفة معيوبة ,,, 
فهذا وقع في غرام حبيبته ,, لأنه رأى شعرها يتطاير يمينا و يسارا ,, قالك بس بقى ,, هي دي فتاة احلامي ,, هي دي الي هتجوزها
و التاني ,, شاف البت بيضا بيضا بيضا البت بيضا و انا اعمل ايه ,, قالك بس ,,, يا بركة دعاكي ياما 
و لا  اغلب قصص الحب العنيفة الي بتصوركل صراع الطبقات ,, و الغني بيحب الفقيرة او العكس ,,, 
و كل قصص الحب دي بتنتهي في الاخر نهايات سعيدة ,, و بيعيشو في تبات و نبات و يخلفو صبيان و بنات 
و بالتالي احنا بقينا نشوف الحاجات الي هما بيعملوها في الافلام دي ,, او في الرواية ,,, على ان هو ده الحب ,, 
بقينا بنمارس أفعال ,, و بنعتبرها هي دي الحب ,,, و رد و دباديب و قلوب حمرا كتير 
مشكلة المنظور ده انه منظور سطحي جداا ,,  هو قد يناسب واحد عايز يجوز عشان يشبع غريزة عنده و خلاص ,, بدون تفكير لعواقب او تبعات للي هيحصل ده 
و بالتالي بنرجع نتسائل و نبحث و نفكر ,,, ليه نسب الطلاق مرتفعه في مجتماعاتنا ؟!! 
عشان البداية اصلا غلط أيها السادة ,,, 
الناس  فاهمين الحب غلط
و الجواز غلط 

" سمعناهم يقولو العشق حلو ... و آخره علقم " 

الحب هو ذلك الرباط المقدس الذي يجمع إثنين ما بقي لهما من العمر سويا ,,, 
الحب ,, هو الخطوة الاولى للزواج ,, فلا حب بدون زواج ,, و لا زواج ناجح بدون حب 
الحب هو دراسة ,, و بحث و تمحيص من كلا الطرفين ,, ليتأكد من أن الطرف الاخر بالفعل هو من يراه يصلح أن يكون شريك حياته ..
الحب هو أدراكك أن نصفك الاخر غير كامل ,,, و رغم ذلك ستتقبل هذا النقص ,, لأنك تعلم أنك أيضا غير كامل 
الحب هو تقبلك لشريكك ,, على الرغم من نصفه الاسود ,, الذي لا يرضي أحد أبدا حتى هو ,,, 
الحب هو اختيار 
الحب  قرار ,, 
بعد البحث و الدراسة و التمحيص ,, و بعدما أصبحت ترتأي أن هذا الشخص هو من يصلح أن يكون شريك حياتك ,, طبقا لمعرفتك بنفسك أولا ,, و استنتاجك لطبيعة الشخصية التي ترى انها تصلح أن تكون زوجك .. طبقا لمعايير محددة ,, واضحه ,, و سليمة ,, و قوية ,,, تكون أكبر و اقوى بكثير ,, من مجرد رؤية شعر يتطاير ,, او امرأة حسناء ,, أو قوام ممشوق ... 

عندها يبدأ الحب في النضوج ,,  و التحول ,, من بذرة صغيرة ,, الى شجرة كبيرة ,, تستظلو بورقها ,, اذا ما طال بكم المسير ,, في رحلة العمر ,, 
تحتمو بحماها ,,, اذا هبت عليكم ,, رياح الدنيا ,, بما لا تشتهيه الانفس ,,, بما يعكر صفو الحياة و نقائها ...  
تتمسكو بجذعها ,, عندما تتخطفكم نوائب الدهر ,, و مصائبه ... 

و كلما كان جذر هذه الشجرة أقوى ,, نظرا لأن البداية كانت صحيحة ,, و قوية ,,,
كلما تحول كل طاريء على حياتكم ,, الى مغذي لهذه الشجرة ,, فتجدها على عكس المعتاد ,, تكبر و تضخم مع كل ريح تهب عليها ,, مع كل محاولة لاقتلاعها من جذورها ,,, 
و كلما تقدم بكم العمر ,,, تصبح الحياة أيسر في ظلها و حماها ,,, تصبح هي الملجأ و المأوى ,, 
تصبح هي السكن ,,, بعد رحيل الاولاد و الاقارب ,,, كلٌ في دنياهُ تلهيه ,,, 
عندها ,, يصل الحب الى مرحلة من الاكتمال ,,, فها قد أدى الرسالة ,, و ساهم في تكوين أسرة ,, قوية ,, متماسكة ,, اعانهم على تجاوز ازمات الحياة و مصائبها ,, 
يبقى ملازما لكما ما بقي في صدركما من نفس ,, 
فهل قابلتم في حياتكم من هو أوفى من هذا الصديق ,,, 
كونو أوفياء للحب ,,, يكن وفيا لكم ... 

أي كلام

* هو مين مصر ؟ ايه هي مصر ؟ عبارة عن ايه يعني ؟ 
اكتر سؤال يتبادر الى ذهني بمجرد ما اسمع اغاني وطنية او اي شيء من هذا القبيل 
بالنسبالي مصر عبارة عن قطعة من الارض الناس اتفقو هيسموها كده ,, خلاص بقى مش شغلانة كل شوية " مصر شالت فوق طاقتها يرضي مين " و " يا حبيتبي يا مصر يا مصر " و " المصريين اهما .. " و خلافه من الهري الذيذ الي أساسه هو وضع كلمة "مصر " في اي جملة ,, مفيدة او غير مفيدة ,, مجرد وجود كلمة مصر في الكلام هيحوله لكلام مهم و ذو قيمة و مفيد ,, و شوف حكمة ربنا يا مؤمن :D 
بدون الدخول في تفاصيل ,, احنا اوفر قوي في التعبير عن حبنا او انتمائنا للقطعة من الارض الي اتولدنا فيها ,, و مفيش حنان للارض دي و لا حاجة ,, و البلد دي مفيهاش حاجة حلوة و لا حاجة خالص على فكرة 
و مفيش حد من الي مجرب و فارقها قال في الدنيا مفيش بعديها خالص ( موجهة للاستاذة شرين ) 
عادي يعني في ناس اتولدو هنا و عايشين بره في حتة تانية و مبسوطين و فرحانين و مش حاسين ان ناقصهم  حاجة و لا هم يحزنون ,, 
كفاية بقى ,, 
انا كتبت الكلام ده هنا عشان خلاص ,, هفرقع , ,, افرقع هنا احسن ما تيجي في سواق ميكروباص و لا تاكسي و اوحشكم بقى :D 

*
العالم كله بالنسبالي اصبح عبارة عن مكان للهري ممتليء بالناس الهرايين ,,, و اي حد بقى يقول اي كلام بعتبره هري ,,, باستثناء بعض النماذج القليلة جدا الي يعدو على اصابع اليد الواحده الي بعتبر كلامهم مفيد ,,, 
و بالتالي انا اي حد بقى بيقول اي كلام بجد في رغبة اني اقعد اضحك عليه بس بمسك نفسي 
انا كمان بهري على فكرة ... و ما أبريء نفسي 
* بالرغم من اني كائن بحب الوحدة ,, و بحب اخرج لوحدي او اقعد مع نفسي كده لوحدي ,, مبحبش مخالطة الناس كتير ,,, ( أو هكذا أصبحت منذ فترة ليست بالقصيرة ) بس مؤخرا  اكتشفت حاجة ,, الوحدة بتبعدني عن ربنا جدا ,, بتكلني الى نفسي ,, و انا نفسي سيئة جدا و أمارة بالسوء جدا جدا ,,, ساعات وجود الصحبة الصالحة ,, مش حتى صالحة بالصورة المثالية ,,, مجرد وجود ناس احسن منك حتى بيساعدك انك تتدراك عيوب نفسك و تحاول ان تقيمها على الصراط المستقيم ,, بيلفت انتباهك حتى ان في حاجة غلط ,,, و بالتالي بتقدر تصلحها,, 
انما وجودك لوحدك بيسيبك لنفسك ,, بتعمل فيك الي هي عايزة تعمله و مبتقدرش تقاوم او حتى في اوقات كتيرة تكتشف ان اصلا في حاجة غلط ,,, مبتكتشفش ده غير بعد مدة ,, لما تخاالط حد صالح  او احسن منك يكشفلك ده 
مش عارف ايه الحل للنقطة دي ,, زمان الصالحين كانو بيحبو العزلة عشان تقربهم من ربنا و يقدرو يختلو بيه ,, دلوقتي العكس ,, لعزلة بتعزلنا عن ربنا  حتى و بتسلمنا للدنيا تسليم أهالي ,,, و هنا يظهر الفرق واضحا و جليا ,, كيف تمكنت الدنيا من قلوبنا ,,, و كيف وضوعووها على أكفهم استعداد لتركها 
و يبدو الفرق بين نفوسنا و نفوسهم ,,, 

*بحب قوي لما اعرف حاجة جديدة اعرفها للناس كلها ,, ساعات بحس ان ده فرض عليا  كمان زي ما رامي كان قالي قبل كده ,,,, 
من ضمن الحاجات الي نفسي اقولها للناس كلها 
- عيشو كل حلظة و ادوها حقها ,,, متبقوش في المدرسة و بتفكرو في الجامعه ,, متبقاش في الجامعه و بتفكر في الشغل و شايل همه ,, استمتع بكل لحظة عايشها لانها مش هترجع تاني ,, و كل فترة في عمرك ليها مميزاتها ,, استغلها على قد ما تقدر و اتمتع بيها تماما متخليش حاجة تاثر عليك ,, 
- فترة الجامعه فترة ذهبية جدا جدا جدا ,, مع اني كنت دايما بتمنى اتخرج و مستني اليوم ده ,, بس كنت عارف اني هخسر كتير قوي لما اتخرج و قد كان ,,  و الواحد هياخد وقت لغاية ما يعتاد الوضع الجديد برده 
- من راي ان وجود طبيب نفسي أساسي لكل أسرة لا يقل أهمية عن وجود طبيب عضوي ,,, 
اهمية وجود طبيب نفسي بصورة رئيسية في حياتك ده شيء كبير جدا ,, احنا مش مهتمين بيه ,, و عشان كده اغلب تصرفاتنا و سلوكنا غلط ,,, تربية الكثير من الاباء و الامهات للابناء بتكون غلط ,, و بتخرج أطفال و شباب و رجال معقدين و عندهم مشاكل نفسية بتفضل معاهم لغاية ما يموتو ,, بسبب حاجات حسوها و هما اطفال 
الي يعرف يدور على طبيب نفسي  شاطر و يروحله فليفعل ,, و الي ميعرفش يحاول يقرا في المجال ده الحاجات الي تهمه ,, هيكتشف انها فرقت معاه 
.... 

*  من الحاجات الي مفتقد عشانها اللمة انها كانت بتديني فرصة اني كل ما أقرا كتاب حلو و يعجبني اني اوصله لكل الي اقدر اوصلهوله ,, و انقل المعرفة ليهم ,,, عملت ده مرتين قبل كده ,, و مع كل كتاب جديد حلو بقرأه بقول فين أيامك يا لمة ,, كان زمانه فرق مع ناس دلوقتي 

* هاني ,,, و حشني قوي ,, و مؤلم جدا اني عايش حياتي في نفس البلده الي هو موجود فيها بيني و بينه أمتار ,, و عارف انه مقيد و حريته مسلوبة منه ,, و انا منطق و عايش حياتي ,,, صدقت مؤخرا جداا بموضوع التخاطب الروحي او توارد الخواطر ,,, و بقيت كل يوم الصبح و انا رايح الشغل و معدي  عليه ,, اقوله صباح الخير يا هاني يجعل نهارك سعيد ,,, و انا راجع اقوله مساء الخير يا هاني ربنا يعينك ,,, معرفش بقى بيوصله و لا لأ ,,, لما يبقى يطلع هبقى اعرف ان شاء الله 

* من الحاجات الملفتة  جدا اختلاف طريقة تعامل  ناس كتيرة معايا بعد ما اشتغلت ,,, بقى في قدر أكبر من الاحترام في التعامل ,,  و اسلوب جديد في الكلام ,, و ناس مقربين جدا ليا بقو يقولولي يا بشمهندس !! مش قادر اوصل لسببب معين يخلي في تحول لطريقة تعاملك مع اي حد لمجرد انه اشتغل ,,, لو حد عارف يقولي ,,, 


* انا حتى الان مش عارف اروح معرض الكتاب و مش واضح حتى في الافق هروحه امتى ,,, و ده شيء مزعج جدا جدا 

زحمة ..

مش عارف هي مالها فتحت قوي كده ليه مع اني فعلا مشغول ,, و محتاج انام بدري ,, بس انا حاسس اني محتاج اكتب فعلا .. 

عن هاني ,, صاحبي الي و حشني زي ما مفيش حاجة في الدنيا و حشتني قده ,, شبه يوميا دلوقتي بحلم بيه ,,و بحلم بحاجات بسيطة ,, بنتكلم مع بعض ,, بنضحك مع بعض ,, آخر مرة دي حلمت اننا حضنا بعض و قعدنا نبكي ,, 
صحيت من النوم ز علان اني صحيت ,, كنت دفيان جدا في الحلم ,, 
صدقا انا محبيتش حد في حياتي زي هاني ,, متوجعتش لحد في حياتي قد هاني برده ,, و نفسي يخرج عشانه و الله ,, هو تعب ,, و نفسه يرتاح ,,  و مش يرتاح ,, هو عايز يكون شخص فاعل ,, شيء سيء جدا انك تجيب حد زي كده و تحجمه بالصورة دي و بالمدة دي ,, شيء قاتل ,, بدعي ربنا يخرجه زي ما هو ,, و ان كان صعب ,, بس عالاقل يكون اتغير لاحسن ,,, و يقدر يرجع بصورة لطبيعته و يتعايش زي ما كان قبل كده ,, و الاهم من ده كله يا رب يخرج بسرعه .... 

عن Arabs got talent البرنامج الي بحب اتفرج عليه ,, لاسباب كتير ,, بحب قوي اتامل شخصيات الناس الي طالعه و شايفة ان عندها موهبة ,, و في غالب الاحيان بيكون الي و اثق جدا من نفسه لدرجة الغرور هو مسخرة الحلقة و اكتر اداة للضحك فيها 
و تبقى دائما الثقة المشوبة ببعض القلق ,, هي حال الناجحين و المتميزين منهم 

عن فرقة ال" أطفال "  الفلسطينية ,, الي ابدعت ,, و تالقت ,,و قدرت تكسر الحصار ,, و الخراب و الدمار 
الموهبة لا تعرف حدود ,, و لا ظروف ,, و الي شايف حلمه و هدفه قدامه هيتحرك عشانه ,, و لو كان قاعد مش ضامن اصلا هيعيش كمان ساعة و لا سقف بيته هيقع عليه و تنتهي حياته فورا 
الي عنده حلم بيحاول مرة و اتنين و ثلاثة لغاية ما يوصل ,, و يوّصّل الي هو عايزه للناس كلها ,, رسالة قدرت تعبر الخراب و الدمار ,, و تقول احنا لسه موجودين ,, صامدين ,, و مقاومين ,, فصبرا يا آل فلسطين ,, عل الله ان يفرج عنكم عما قريب

البداية ..

مع اني مش فاضي ,, و عادة لما بكتب بكون مروق بالي و بحاول استخلص الافكار نقية ,, بس المرة دي مختلفة ,, وغير 
حدث تاريخي بالنسبالي ,, هيبتدي خلال ساعات ,, حياتي كلها هتتغير بسببه 
هبتدي شغل ,, اول يوم شغل ,, 11/1/2015 ,, 
بداية جديدة لمرحلة جديدة تماما من الحياة ,,الصراحه خايف و انا مقبل عليها ,,, كخوف اي شخص مقبل على شيء مجهول ,, و ان تحلى بروح المغامرة ,, بيبقى في سِنة خوف مجهولة كده و غامضة ,, مبهمة ,, مش عارف انت خايف من ايه تحديدا ,, بس خايف و قلقان و خلاص 
على نغمات علي الحجار ,, وهو يدندن بكلمات " إزاي تكون أنت ؟؟"
خواطر كتيرة تتزاحم في راسي بقالها ايام 
هل انا كده بودع حياة الرخاء و الفراغ و الدماغ الفاضية و الروقان ؟ 
طول عمري بتعامل معايا على اني طفل ,, انا عيل صغير ,, و من اهم مشاكلي في الحياة اني عيل ,, و رافض اني اكبر ,, انا مش عايز اكبر ,, الصِغَر حلو ,, و جميل ,, و ممتع ,, و روقان كده و استجمام و انسجام 
و لما بيجي في بالك حاجة بتعملها على طول ,, هامش التفكير  و شيل الهم عندك قليل جدا ,, مهما كبر في الفترة الي فاتت بسبب الظروف و الاحداث فهو لا يزال صغير و قليل ,, مقارنة بالي انت مقبل عليه ,,, 

شوية حاجات حابب اسجلها نفسي احافظ عليها و الشغل ميغرنيش فيها " و انت كنت اشك في ده ,, انا كل حاجة بتعدي عليا بتغير فيا " بس الحاجات دي فعلا نفسي احافظ عليها 
نفسي احافظ على الطفل الي جوايا ميكبرش ,, مشيلش الهم اكتر منا شايله 
افضل اتعامل مع الحياة بنفس البساطة الي بتعامل بيها معاها ,, 
نفسي احافظ على نصيب ربي - أهلي - أصدقائي - نفسي - مجتمعي  من و قتي ,, 
نفسي احافظ على نفسي  ,, جدا ,, كمية الامراض التي تطل براسها عظيمة جدا ,, بداية من العجب - كبر - غرور - الشح .... و حاجات تانية كتير ,, و انا نفسي اصلا ضعيفة و هشة ,, و بعالجها و دايما بطلب ربنا يساعدني في ده ,, و لم يتسنى لي حتى تقويمها بالقدر الذي يجعلها تقوى على مواجهة مثل هذه الإبتلاءات و الامراض ,, و لكن نسال الله السلامة ,, و العفو و العافية ,, و اهمها على الاطلاق ,, أسأله العَون :) 
نفسي أفضل متمسك بعروبتي ,, و بديني ,, اصوله و فروعه  لا يقل منها شيء بل يزيد  ,, في ظل مخالطة مجتمع جديد تماما ,, منفتح كانفتاح الغربيين ,, قل فيه من يتحدث العربية العامية ,, حتى ,, و قل فيهم الانتماء لدين الله الحنيف ,, و هو أمر لو تعلمون على نفسي عظيم ,, 
نفسي الدنيا متغرنيش و متاخدنيش ,, افضل فاكر ربنا ,, و متعلق بالآخرة و ازيد كمان 
الاختبار الاقوى ,, ان احافظ على نفسي ,, و لا اتحول الى قرويّ ساذج ,, بهرته أضواء المدينة ,, فنسي نفسه ... , و غرق في محاولات التَمَدّن العبثية ,, فيتحول إلى مسخ ,, لا يشبه لهذا و لا ذاك ,, 

و على الجانب  الاخر ,, فهناك الكثير و الكثير من المزايا و المنافع التي ساحصل عليها ,, و ستضاف الى  حياتي 
فبدءا من وضع مادي جديد ,, مريح نسبيا عن سابقه  مرورا باكتساب خبرة جديدة تضاف و تثري و تصقل في نفسي و شخصيتي 
كما يضاف التعامل مع وسط جديد ,, مليء بالناجحين ,, و بأشخاص يدعموك و يساعدوك حتى تنجح ,, كل الامكانيات سيتم توفيرها لك ,, انتهت الاعذار و الحجج ,, و حان و قت العمل ,, و المضي قدما في تحقيق اهدافي و خططي ,,, 
انها البداية ,, و مفترق الطرق ,,,  بداية لمرحلة جديدة ,,إما أن اتحول  فيها الى شخص مادي دنيويّ كبلته قيود الدنيا و المادة ,, فأصبح يجري لاهثا و رائها على أمل الوصول الى شبح السعادة المنشود ,, فيضل طريقه ,, و يهوى في النهاية الى و ادٍ سحيق
أو  اكون فيها كما أتمنى ,, مسلم ناجح يمثل صورة طيبة للانسان المسلم الملتزم  ,,و قدوة للشباب المحبط اليائس الذين كنت منهم ,, أرتقي بنفسي ,, و بأسرتي و أصدقائي ,, و مجتمعي الصغير الذي أحاول التأثير فيه قدر المستطاع إيجابيا ,, معتمدا على أثر الفراشة ,, و آملا فيه أن يحول هذا التغيير البسيط إلى تغيير عظيم ملموس ,, 
انتهى و قت الحجج و الاعذار 
و بلا نقاش ,, وجب عليّ توديع الكسل و حياة الدعة و الخمول ,, و حان و قت العمل 
فإما أن أُريّ الله من  نفسي خيرا فيرزقني الاستخدام ,,, أو يكون الاستبدال و العياذ لله 
موعدنا بعد عام من الان ,, و تقييم جديد ,, أقرأ فيه هذه الكلمات ,, و أقارن ,, هل حدث ما كنت أخشاه ؟ ام تغمدني الله بحفظه و رعايته 
أما الآن ,, فقد حان وقت الانطلاق , فالله المستعان :) 

كلمات ضاق بها رأسي ..

عودة من جديد ,,, 
فترة طويلة مرت منذ آخر كتابة ,,, كنت فيها لا أستطيع الكتابة ,, أفتح المحرر المرة تلو الأخرى فتهرب الكلمات و الافكار  و تختبيء خلف جدران مزيفة تخفي ورائها الكثير و الكثير و تبدو في ظاهرها مستقرة وهادئة 

هرجع أدون تاني اللي انا حاسه ,, كما يكون ,,, عامية ,, او بالعربي الفصيح ,,, 
المرة دي الدنيا ماشية بسلاسة أكتر ,, في حاجات كتيرة في دماغي ,, 
يمكن عشان السنة هتخلص ,, و في تغييرات كتيرة ,,  

** أنا اكتشفت إني بحب العربية الفصحى جدا ,, بستمتع بالكتابة بيها ,, و بستمتع بقرائتها ,, ممتع جدا انك تفكر و تشغل مخك عشان تكتب جمل  كويسة ,, محتاج اتعلمها في أقرب فرصة ,, لغة جميلة ,, تأمل تراكيب القرآن في حد ذاته يخليك تجري عليها بكل ما تملك العامية أقرب ليا عشان ممارستها أكتر من الفصحى ,, و لكن لازم اتعلم فصحى و اتعلم أكتب بيها و أتحدث بيها كمان 

** في ناس كتيرة بتذنب,, تقريبا كل الناس بتذنب ,,, و بتعصي ربنا ,, حلم ربنا علينا إنه ساتر كل ده ,, حليم ستار ,, كل واحد في الدنيا دي عنده ذنوب و معاصي و حاجات تغضب ربنا ,, ربنا ساترها عننا ,, و حليم ,, صابر عليه لغاية ما يتوب ,,,,, 
سيدنا النبي قال كل أمتي معافى إلا المجاهرين ,,, يعني كون انك تعمل الذنب ده مش مشكلة قد ما هي مشكلة انك تجاهر بالذنب ,,, 
موقف شفته مؤخرا ,,, واحده من الناس الي كنت بحترمهم قلعت الحجاب ,, معنديش مشاكل ,, ربنا الي هيحاسب مش أنا و محدش فينا سليم ,,, و لكن , إن الموضوع يتم إعلانه بصورة فجّة ,, صورة ليها بشعرها ,, مع ذكر انها في تاريخ قريب ,, و يقوم أصدقائها ينطلقو في التحفيل على كل الناس الي هيدخلو يبدو استنكار لفعل ده ,,, و سخرية و استهزاء و ضحك للركب ,,, و الناس مستمتعه جدا 
الأجمل هي تعليقات الاخوة و الاخوات الي ربنا يباركلهم " الله شكلك جميل قوي " " الصورة مبهجة جدا " " صورتك دي فرحتني جدا " " متتصوريش الصورة دي بسطتني ازاي " ,,, ايه الي يبسط في إن واحده صاحبتكم قلعت الحجاب ؟ 
شكلها جميل عشان بشعرها ؟ طب ما عادي ,,, عذرا على التشبيه و لكن النت مليان صور لبنات عرايا و صورهم جميلة برده ,, هو ده المبدأ يعني ؟ الجمال و البهجة ؟ 
طب محدش زعل لزعل ربنا انه هان على عبد من عباده ؟ و هو أغنى الشركاء عن الشرك ؟ 
يعني ربنا مش في الحسابات خالص ؟ حلال و حرام ؟ كام واحدة هَتُفتَن بحاجة زي دي ؟ التهليل و التكبير لمن يرتكب ذنب لهو أغرب ما أُبتلينا به في أيامنا هذه ,,, 
مؤسف إني أشوف الواقعه دي عقب أنتهائي من كتاب خلاني أكتر حاجة شاغلة بالي هو إزاي احنا عايشين أيامنا دي بالبعد ده عن دين ربنا و بندعي الاسلام ,, و ان قد ايه الاسلام ده دين  متزن ,,, كامل ,, منزه عن كل نقص و عيب لآنه منزل من عند باريء الكون و خالق الخلق ,,, الوحيد الذي ينسب اليه الكمال و التمام 
منعرفش عنه غير شوية قشور ,, صلاة صوم ,,زكاة حج ,,, الصدق و الكذب ,,, الغيبة ,,, الحجاب ,,, و الحاجات دي الي توارثناها بالعرف ,, مش تعلمناها تعليم إسلامي صحيح ,, و رغم كده بندعي اننا مسلمين 
انا أسأل الله أن يعفو عنا و يغفر لنا ,,, و يرحمنا ,,, و يغفر تقصيرنا و ذلاتنا و ذنوبنا و معاصينا ,و و يغفر انشغالنا بدنيانا عن أخراه ,, و انشغالنا بدنيانا عن دينه ,,, انشغالنا بما سخره لنا عما سخرنا له ,,, و هي لأمور لو تعلمون عظيمة .. 

** أنا بحب ربنا جدا ,,,و بثق فيه جدا ,, و ومؤمن بيه جدا , عندي دلائلي و قرائني التي قد لا تصلح لأحد غيري ,, لكني مؤمن ان ربنا موجود و خلقنا لهدف ,, و بيساعدنا و بيدعمنا ,, و بيصبر علينا ,,, علاقتي بربنا مش كويسة قوي ,, اقل من العادي ,, كل الناس أحسن مني تقريبا في علاقتها بربنا ,,,و لكني أطلب من ربنا على طول انه يأخذ بيدي إليه ,, و موقن فيه انه مش هيسيبني أهلك ,, و مش هيسلمني لنفسي تجرني لغاية النار ,,و دليلي على كده انه كل شوية بيحطلي حاجة في الطريق ,, تساعدني و تاخد بايدي ,, و تنورلي حتة ضلمة جوا عقلي معرفش عنها حاجة ,,, و لسه ,, مستني يا رب ,, 

** العقد أتفرط من يوم ما هاني أَعتَقِل " كلمة قالها عبدالله أبو الوفا وكا انت صادمة جدا ,, فعلا عقدنا اتفرط بدري جدا ,, فجاة الصحاب اختفو ,, و من تبقى منهم في طريقه للاختفاء ,, كل واحد هتاخده دنياه و تلهيه ,, الله أعلم مكتوبلنا ايه في الايام الجاية بس أصدقاء الجامعه هما أفضل أصدقاء اتعرفت عليهم في حياتي ,, و معتقدش ان ما بقي في العمر هيسمح بالتعرف على حد و مصادقته بمثل هذا الود و الحب 

** 2014 طلعت سنة حصل فيها حاجات حلوة ,, و كتيرة كمان ,,, أمين خف و بقى كويس و بيتحرك ما شاء الله ,, هاني و مصطفى امتحنو العملي وناقشو المشروع و احتفلنا بيهم في الكلية وكده مش هيبقى ضاع سنة من عمرهم عالفاضي ,,, عبدالهادي خرج ,,, راشد و سعد و استاذ هشام و احمد فتحي خرجو الحمد لله ,, و انا قبلت في شغلانة مكانتش تخطر على بالي في أفضل أحلامي ,,, 
مؤسف ان الي فات ده بقى يعتبر بالنسبالنا أخبار مفرحة ,, بس الحمد لله ,, يا رب العام المقبل يكون أفضل ,, و أسعد ,, و كل قضاء الله خير 

** لسه في حاجات كتيرة في دماغي بس بتهرب مني برده ,,, لعل و عسى تيجي في فرصة تانية ,,, 

وحدك .....

أما و قد غدوت وحدك يا صغيري  , لا انيس لك و لا رفيق ... 
لا أجد ما اقوله لك ,, حقا لا اعلم ما هي مشكلتك مع الاصدقاء ,,,, وكأن القدر اختارك من بين الملايين لتصير و حيدا و ان اجتمع حولك الناس كلهم ,, 
هذه هي طبيعتك و هذه هي فطرتك ,,,  تحب الناس كلهمُ و لكن لا تتخذ لك خليلا الا و احد او اثنين في احسن الحالات ,,, و على مدار حياتك ,, عدد الذين اتخذتهم أصدقاء لا يتجاوز أصابع اليد الواحده ,,, كلهم فرقت بينك و بينهم الاقدار ,,, 
فهذا باعدت بينكم المسافات و الاسفار ,, ثم باعد بينكم الزمان ,,, و لم يقدر لكما لقاء الا بعد أحد عشر عااماا ..! و كان حينها كل شيء قد تغير ,,, 
و هذؤلاء لم يكونو على مستوى الثقة التي و ضعتها فيهم ,,, لم يكونو اصدقاء ببحق ,,, كنت تهين نفسك بالتقرب اليهم ...
اما هذا ,,, فقروي ساذج بهرته اضواء المدينة فنسي نفسه , تغير كل شيء في حياته , وتلك النظرة المتعالية التي ينظر بها اليكم , فلتذهب الى الجحيم انت و مدينتك ..!! 
و اخيرا ,, و ما ان وجدت ضالتك ,, صديق تأنس اليه روحك , و ترتااح اليه نفسك , يفهمك قبل أن تتحدث , و تفهمه 
تعلم خبايا نفسه , و يعلم خبايا نفسك ,, لا يضن عليك بالراي و المشورة 
و انت كذلك ,, لا تضن عليه بالراي و المشورة 
و جد كل منكما في الاخر سكنه و ملجأه 
و كنتما أكثر من اخوين ,,, 
و استمرت تلك الصداقة ما شاء الله لها ان تستمر  ثم فرق بينكما  معتد غاشم ظالم ,,,  
و طالت مدة الفراق ,, فها هي تتجاوز السنة ,, تغير فيها كل شيء ,, كل شيء ,,  

مشفقٌ عليك انا يا صغيري ,, و لا اعلم ما اقوله لك ,,, 
وحدك انت و لو ادعيت عكس ذلك امام الجميع ,, 
و حدك و ان ادعيت انك تأنس بتلك الوحدة 
وحدك و ان كنت وسط الالاف من اصدقائك 
و حدك وان أُهديت كل يوم ألف هدية ,,, 

قليل هو من يفهم تلك المعاني الصغيرة لما يسمى بالصداقة ,,, تلك التفاصيل الصغيرة التي يهملونها جميعا ,, فتجعل علاقاتكم فاترة ,, عابرة رغم انوفكم ... 
اي دفء تلقيه تلك الصداقة في قلوب جفت و تجمدت من برد العلاقات ,, قلوب اشتاقت لذلك الدفء الذي يسري فيها فتدب فيها الحياة مرة أخرى بعد ان ظنت انها قد ماتت ,,, و فقدت القدرة على الاحساس او على الحياة 
و أعظم الصداقة , هي أنس يجده الصديق الى صديقه ... فتصبح روحاهما روح و احده تفرقت في جسدان ....

قواعد الحياة العملية الاربعون ...

" أما و قد كبرت يا صغيري , و تركت كليتك ,  جامعتك , صحبتك , و قريبا ستبتعد عن منزلك ... لم تعد علاقاتك مع أصدقائك كما كانت عليه سابقا ,, فها قد انشغل كل منكم بحياته و مستقبله ,, ربما باكرا ,, و ربما وصلت أنت متاخرا ! ... 

ها قد انفرط عقدكم ,,, واصبح من الصعوبة  بمكان لقائكم ,,, و اصبح المكان الوحيد الذي يتيح لكم فرصة للتواصل الان هو مواقع التواصل الاجتماعي , تلك التي تفتح لك نافذة على بعض ما يريد هؤلاء الاصدقاء اخبارك به ,, فحاول ان تغتنمها ,,, 

أُلقيَ على كاهلك المزيد من المسؤوليات التي لم تكن تلقي لها بالا فقط منذ ايام مضت ! 

فوجدت نفسك مطالبا فجاة بالبحث عن عمل و تاهيل نفسك و تعليمها و ترقيتها ,, 

هذا خلاف تلك المسؤولية الكبرى ,,, تكوين تلك اللبنة في المجتمع ,, التي ستكون أنت شطر نواتها ,,, و يالها من مسؤولية ! 

أختلف الناس الذين تتعامل معهم ,,,  فهنا ,, في هذا العالم لا تتحدث الا لغة المنفعه ,,  الا من رحم ربي ,,, 

لذا ,,, لزمك يا عزيزي ,, تلك القواعد التي ستحفظ لك  نفسك ,, و تبقي عليك روحك , فالتزم بها يا ولدي تكسب و تغنم ,,, 

و اكتبها يا ولدي بقلمك الرصاص ,, حتى يتسنى ك تعديلها متى اردت ذلك ,, فلا شيء في هذه الحياة يبقى على حاله ... 

وفقك الله لكل ما يحبه و يرضاه " 

من صديق عزيز ... 

في رايك ,, هل نحن فعلا في حاجة الى تلك القواعد؟ 
و اذا كنت ترى ذلك فاذكر امثلة  على تلك القواعد ,, من واقع رايك او خبرتك .. 
في انتظار مشاركاتكم .. 

سنة ,,,
كلها ايام و يبقى فات سنة على ابشع مجزرة تم ارتكابها في حق المدنيين في اخر 40 سنة عالاقل ,,
اتقتل اكتر من 1500 واحد و حتى الان مفيش حصر دقيق مات كام واحد عشان المفقودين و  خلافه ,,
اتقتلو   و قاتلهم طلع يتباهى بقتلهم و يتفاخر بيه

جريمة في اي حتة تانية محترمة او حتى مش محترمة بس ناس عنددها ضمير او حتى مش عندها ضمير بس بني ادمين عايشين ,, بشر يعني ,,, كان هيتاخد حق الناس دي و هيقتص للي قتلهم
سنة عدت بسرعه قوي ,, و في ام لسه بتدور على ابنها ,, اه عرفت انه مات بس على مدار سنة متعرفش هو مدفون فين ,, اه و الله
و في ام تانية السنة عدت عليها و هي مش عارفة تقتنع ان ابنها مات ,,,
و في ام ثالثة بقى مستحملتش ,, قالولها ابنك مات راحتله جري !!
و في اب قالوله ابنك مات نقلوه عالمستشفى و ايام وح صله
ده غير العائلات الكاملة الي عايشة في قهر بقالهم سنة
سنة يا جماعه
365 يوم ,,,

كلها شهر تقريبا و يبقى هاني و مصطفى كملو سنة اعتقال و في ناس اعرفهم اتموها بالفعل
سنة حبس اعتباطي ,,, مفيش دليل ,, مفيش تهم ,, بس احنا حابسينكم احتياطي
40 الف معتقل طبقا لاخر احصائية
على فكرة المعتقل مبيحسبهاش بالسنة و لا بالشهر
بالتجديد ,,
بالساعه ,,, الساعه بتفرق معاه و الله
تخيل نفسك قاعد في اوضتك في بيتك ( الي هي اوسع بكتير من الزنزانة )  مع ناس متعرفهومش  و قولي اطول فترة هتستحملها قد ايه ,,,
و خلاص ,,, كل الناس عاشت حياتها عادي
في داهية الي ماتو ,, ربنا يرحمهم
و الي في السجون دول هنعملهم ايه يعني ,, ربنا يتولاهم ,,
طب هو انتو عايزين ربنا يعمل كل حاجة و انتو مش عايزين تعملو اي حاجة خالص !!

خلاص استسلمتو و عايشين مستنين دوركم ؟!!
خلاص العجز تمكن من الجميع ,,, معادش في اي حد بيعمل اي حاجة
بنخرج و بنتفسح و بنعمل كل حاجة ,, عايشين حياتنا طبيعي ,, جدا ,, قوي بقى يعني ,,
يا جدعان احنا على وشك منبقاش بني ادمين و الله ,,, الحيوانات و البهايم مش هتعمل الي احنا بنعمله ده ,,
انا على وشك اني اكره الناس كلها ,,, كلها ,, كلها والله بلا استثناء ,,
انتو ازاي عارفين تعيشوا كده !!!!
يارب ارحمنا من الهم و الغلب الي احنا فيه ده ,,