رنيم

رنيم

كان  يا ما كان .. في حديث الزمان

طفلة اسمها رنيم

رنيم دي كانت في ثالثة ابتدائي

رنيم طفلة ذكية جدااا و شطوورة جداا .. بتطلع الاولى عالمدرسة

رنيم نفسها تطلع دكتورة ... هي مش عارفه ليه ..بس هي حابة كده :) 

رنيم بنت دمها زي العسل ..وخفيف جداا

رنيم بتحب الرسم و التلوين

رنيم بنت مبدعه

اتعلمت ازاي تعمل مركب ورق و هي في الحضانة

من ساعتها كل ما تشوف حاج شبه الورقة تعملها مركب

ممكن تمسك فوطة تعملها مركب

ممكن سجادة صلاة تعملها مركب

ممكن عباية تعملها مركب

رنيم بنت مبدعه

مرة و هي قاعدة مسكت فوطة .. قعدت طلعت بيها اشكال كتيييرة جدااا

عارفين الاشكال الي بتتعمل في الفنادق الخمس ننجوم لما تدخل مثلا تقعد على طرابيزة تلاقيه مطبقلك المنديل بشكل معين .. او بطانية السرير مطبقهالك بشكل معين

رنيم قعدت طلعت اغلب الاشكال دي .. من غير ما تشوفها قبل كده .. او حتى حد يقولها انها ممكن تعمل كده

خلت الفوطة شكلها تحفة
وكل ما تعمل شكل .. تروح هاداه و عاملة شكل تاني

رنيم بنت جميلة جدااا .. ربنا ابدع في خلقتها و في خلقها و في حلاوة دمها و روحها

رنيم ابوها عاطل 

ولما بيشتغل بيتاجر في المخدرات

ايون .. مخدرات

رنيم اعمامها اغلبهم غير متعلمين ...وعاطلين .. و برده معندهومش اي مانع في تجارة المخدرات

رنيم المجتمع الي هي اتولدت فيه ..مجتمع غير سوي
مجتمع بيتعامل مع المخدرات عادي .. المخدرات مش ممنوعة هناك

عادي جدا انك تقول لصاحبك معاكش سيجارة حشيش او بانجو ؟؟

رنيم عيلتها عيلة ظروفها صعبة جداا

مش ظروفها المادية .. ظروفها الاجتماعية

اغلب البنات الي في العيلة مطلقات ومجوزين مرة تانية

وصابرين على جوازهم عشان ضل راجل ولا ضل حيطة .. بس هما مبيحبوش ازواجهم خالص

رنيم عندها عمها عنده ضمور في المخ

و اتجوز و خلف بنتين .. برضه عندهم امراض نفسية و عقلية 

رنيم مجتمعها كله منحصر في حاجتين

اما الصيد .. او التجارة الحرة و الاستثمار
والي مش شغال في دي او دي فهو الي بيوفرلهم مخدرات

رنيم البلد الي هي عايشة فيها ... مفيهاش غير مدرسة ابتدائي و اعدادي

و المدرسين الي بيجولها بيجو من بلد تانية شغالين بعقد مش متعينين

بيجو من 9 الصبح لغاية الساعه 11

ويمشو

"بلا حصص بلا قرف"!!

رنيم بلدها مفيهاش مدرسة ثانوي

انت بتخلص وولاد و بنات القرية كلهم بيروحو مدرسة الزراعه يتعلمو هناك

لو انت مصمم تدخل ابنك ثانوي عام يبقى ابنك لازم يضرب مشوار اقل ما يكون نص ساعه مواصلات يوميا عشان خاطر يروح قرية تانية كبيرة شوية ..ومفيهاش غير مدرسة ثانوي واحدة .. كل اهالي القرية دي و القرى المجاورة بيصبو فيها

ومستوى التعليم فيها برده متدني

رنيم ابوها و امها مش بيفكرو في مستقبلها

مش بيرعوها

من وجهة نظرهم هي بنت هتتجوز و تقعد في البيت

رنيم الي بيرعاها جدتها .. هي الي بتوديها للدكاترة لما تعيا و بتصرف عليها مبالغ كبيرة سواء في الكشوفات او العلاج ...
بتخاف عليها و تقول متوديهاش غير لاحسن دكاترة ..وممكن تسافر ساعه او اتنين و تدفع مئاات كشف .. عشان خاطر قالولها ان الدكتور ده كويس

هي الي بتجيبلها مدرسين مخصوص يشرحولها لما تبقى مش فاهمة حاجة من المدرسة...

هي الي بتاخدها تفسحها و توريها دنيا جديدة...

هي الي بتحسسها بالحب و الحنان في الدنيا دي...

رنيم مش فاهمة اي حاجة من الكلام الي فوق ده

رنيم كل الي هي فاهماه انها في مدرسة ... و انها بنت فلان وفلانة

و انها ساكنة في قرية ....ونفسها تطلع دكتورة

متعرفش اي حاجة من الي بيحصل تاني

الله اعلم عارفة ان في حاجة اسمها مخدرات ولا لأ

الله اعلم عارفة ان هي غلط ولا لأ

الله اعلم عارفة ابوها بيتاجر فيها ولا لأ

الله اعلم عارفة ايه تاني و فاهماه ازاي

تفتكرو رنيم  .. مصيرها ايه ؟؟
يا ترى هتطلع دكتورة ؟؟


طب تفتكرو في كام بنت زي رنيم موجودين في مصر
بس محدش يعرف عنهم حاجة؟؟؟؟

تفتكرو هيحققو احلامهم ولا لأ ؟؟؟

طب تفتكرو مين المسئول عن الوضع الي رنيم فيه ؟؟؟

طب تفتكرو ايه الحل عشان نقدر نساعد رنيم تحقق حلمها؟؟؟

هل لو رنيم اتخطفت و ابوها و امها اتحرمو منها .. هل ده هيبقى حرام ؟

يعني الشخص الي هيعمل كده اذنب ..ولا عمل خير انه انقذ بنت زي دي من الضياع ؟؟؟

اللي عنده اي اجابة عن اي سؤال من الاسئلة دي يا ريت يجاوب J

انت محظووظ... انت تستطيع البكاء

السلام عليكم و رحمة الله و بركاته 
الموضوع النهارده قد يكون كئيب شوية ... بس هو وجهة نظر مختلفة ..من واحد بيعاني من الموضوع ده
"انت محظوظ انك تستطيع البكاء "    الكلمة دي كنت سمعتها في فيلم MY NAME IS KHAN 
بطل الفيلم كان عنده مرض التوحد ..ومن ضمن الحاجات الي كان بيحكيها في معاناته انه مبيبكيش ..كان بيحكي ان اخوه حصله موقف و بكى فيه ..وراح قايله الجملة دي .. انت محظوظ انك تستطيع البكاء 
الكلمة دي علقت معايا قوي .. معرفش ليه بس قعدت افكر فيها ... هو ممكن البكاء يكون نعمة ... يعني هل ممكن يكون ان في شخص احسن من شخص لان الشخص بيستطيع يبكي و التاني لأ ؟
اجوبة الاسئلة دي قد تكون بديهية عند بعضكم .. بس كانت اسالة صادمة بالنسبالي .. ليه ؟!!

وانا صغير .. لغاية 3 اعدادي اولى ثانوي كده...كنت شخص زي ما بيقولو عليه كده "قلبه رهيف و دمعته قريبة " :D :D
اقل حاجة ممكن تاثر فيا تاثير غير طبيعي ... كنت لو حد زعقلي بعيط ... لو حصل موقف من حد دايقني .. مبتعصبش ولا بزعق .. بروح معيط ...  كنت لو اتفرجت على مشهد مؤثر اعيط ... كنت ساعات كتيرة اسمع كلمة تؤثر فيا من دعاء او قران و اعيط بسببها 

لغاية اولى ثانوي ... بدا كل الي حواليا ينتقدو فيا الموضوع ده
اهلي ... قرايبي .. صحابي ... كل الناس .. بقو يقولولي مفيش راجل بيعيط ... و انت عامل زي العيال ..وبعضهم قالي زي البنات .. كل حاجة تعيط
ما تسترجل بقى .. خلي عندك شخصية و خليك راااااااجل 
و امثال هذا الكلام ده كتييييرر
والكلام ده كان بيوجعني قوي و الله 
و ساعات كنت بعيط بسببه :D
لغاية ما جيت في لحظة مشئومة .. و قررت اني هسترجل .... انا معنتش هعيط تاني .. هبقى راجل 
و قعدت مدار سنتين او 3 تقريبا .. بخوض مرحلة الرجولة .. كل ما يحصل حاجة من الي بتاثر فيا و احس اني خلاص هعيط ... افضل اقاوم في نفسي  احبس في دمعي  عشان ما ابكيش .. لغاية ما بقت عادة
مبقيتش بعرف ابكي .. وكان بالنسبالي انتصار ساعتها .. انا بقيت راجل اخيراااا ..مبقيتش بعيط ..وفرحت جدااا 
لغاية ما بدا يحصل مواقف كتيرة ... ببقى محتاج ابكي فيها .. بس مش قادر 
عارف انت احساس لما يبقى جواك دموع كتيرة قوي .. بس مش راضية تنزل ... احساس صعب و موجع قوي 
بتحس انك شخص محروم و الله ... الدموع ساعات بتفك كتير 
لقيت نفسي بعد كده تحولت الى شخص عجيب ..... مبقيتش حاببني و انا كده.. مش راضي عني 
الناس راضية عني اني بقيت راجل و مببكيش .. بس انا مش مبسوط .. انا نفسي اعيط
بقى يحصل حالات وفاة ناس عزيزة عليا قوي ..وان ولا ينزلي دمعه .. بتاثر جامد قوي .. و احس اني نفسي قوي اعيط ... بس مش قادر 
يحصل مواقف صعبة قوي ...وانا لا زلت بكبت في نفسي عشان مببكيش ..وتحولت اني مبكبتش .. انا خلاص اصلا مبقيتش قادر ابكي 

غاية ما سمعت الكلمة دي ... انا فعلا اتحرمت من النعمة دي ... بسبب مجتمع احمق حكم على الراجل انه عشان يكون راجل لازم ميبكيش ..... ايه المشكلة يعني لما راجل يبكي ... لا يعيبه ولا ينقصه في شيء .... راااااجل و عنده احساس و دم ... راجل و بيتاثر ..حرام ؟!!! ولا عيب ؟!!!
سيدنا النبي كان بيبكي تير جدااا  سواء عند قراءة القران او عند تذكر بعض الموقف او الحنين للقاء احبابه ... يعني النبي بكى شوقا لانه نفسه يقابل احبابه الي هما احنا ... عايز راجل بقى يطلع يطعن في النبي عشان بكى؟!!!
المهم من ساعتها الدنيا اتظبطط عندي ...وحسيت قد ايه انا محروم ... انا شخص لا استطيع البكاء ..وانا الي عملت نفسي كده بسبب مجتمع احمق عايز يمشيك على مزاجه ...وبقى من اهم امنياتي و احلامي اني ابكي 
والله العظيم بقيت بدعيها في صلاتي 
وكان من اهم 5 دعوات بدعوها في رمضان 
ياااااااارب ... ابكيني من خشيتك 
لان لو دي جت هعتبر نفسي بني ادم انسان .. فيما عدا ذلك انا لا زلت شخص صلب قاسي القلب 

احساس قاسي قوي لما تبقى بتصلي ... و تلاقي الشيخ بيقرا ايات معينة .. الناس كلها تتاثر ليها و تبدا في البكاء .. و انت ساعات تتاثر قوي بس مفيش دمعة بتنزل ... او ساعات ولا بياثر عليك 
احساس قاسي قوي لما تلاقي شيخ يدعي دعاء و تلاقي المسجد بيترج من البكاء و انت قاعد حجر ...ولا بيهز فيك اي حاجة 

وبدا النحس يتفك ... اول مرة ابكي فيها ... بكيت عشاني مش قادر ابكي ... كان حصل موقف مؤثر جداا ..وحسيت نفس الاحساس الموج ده ... انا نفسي ابكي بس مش قادر .. و استرجعت كل القصة الي حكيتهالكم دي ...ولقيت نفسي ببكي لوحدي .. و بكاء غزير استمر تقريبا 10 دقايق او ربع ساعه ...وبدعي ربنا ... يا رب .. رقق قلبي مرة تانية و خليني ابكي مرة تانية 
يا رب .. انا اسف اني قاومت حاجة فطرية انت زرعتها جوايا .. بس مكنتش اعرف ساعتها ..كنت فاكرها رجولة :(
ولا زلت بعاني... بس الدنيا بتلين شوية بشوية 
يعني بدات ساعات كده ادمع ..دمعه واحدة ساعات بتنزل بس بفرح بيها قوي .. بحس ان في امل اني ارجع انسان طبيعي تاني 

مرة تانية بكيت فيها ....وفرحت فيها قي قوي يعني ... كنت بتفرج على حلقة سرور بتاعة خواطر 8 
و لما جه الجزء بتاع فريق مصر لما عملو حفلة يكرمو بيها الامهات الي في المدرسة لانهم اصحاب فضل عليهم 
حسيت قد ايه انا حقير قوي و اني نفسي اعمل اي حاجة مفيدة .. نفسي اسيب بصمة 
ولقيت نفسي قعدت ابكي كتير برضه ...كنت مبسوط قوي و انا بعيط ...اه و الله...احساس معتقدش ان في حد ممكن يحسه .. بس انت بتبكي بحرقة عشان نفسك تكون حاجة ..وفي نفس الوقت انت من جوه قلبك بيزقطط كده عشان انت بتبكي 

ولسه بحاول ... وبدعي ربنا .. ان ربنا يرجعلي النعمة الي انا حرمت نفسي منها تاني 
والموضوع ده كان من اهم اسباب اني اخد قرار ان ياكش يولع الناس ...انا هعمل الي انا عايزه ....طالما مش عيب ولا حرام 
مرة كنت بتكلم مع واحد صاحبي ... فافتكرته بيعيط ..فبقولي انت بتعيط؟؟ 
رد عليا بكل ثقة و قالي "انا لا ابكي "
والله العظيم صعب عليا ...حسيت قد ايه هو محروم ... هو مضحوك عليه زيي 
لغاية ما شفته مرة بيبكي .. فرحت بيه قوي ... انه الحمد لله ...طلع بيعرف يبكي بس هو الي بيحاول يكبت القدرة دي جواه 
هو هيقرا الكلام ده انا عارف ...وقد ميعجبوش ... بس انا بوصل  احساسي و تجربة شخصية .. بعاني منها حتى الان

معلش انا اسف لو كنت طولت عليكو وصدعتكو وجبتلكو اكتئاب
بس صدقوني ..والله العظيم كل الي نفسي اطلع بيه من المدونة دي حاجتين 
اول حاجة متخلوش اي حد يغير اي طبع فيكو ... دي حاجة انتو ربنا كان اختصكو بيها ... 
طالما حاجة مش عييب ولا حرام متخليش حد ياثر عليك فيها .. دي نعمة من عند ربنا و سيب الي يقول يقول 
تاني حاجة ادعولي ان ربنا يرقق قلبي و يرجعلي النعمة الي انا حرمت نفسي منها دي ...والله نفسي قوي ارجع زي الاول "قلبي رهيف ..ودمعتي قريبة" :) 
تحياتي و اسف لو كنت طولت او فصلتك عن مود كويس انت فيه بعتذرلك جدا بس انت المفروض تدوينة زي دي متكئبكش ... لو بتبكي ... افرح انك لسه شخص نقي الحمد لله ربنا لسه بينعم عليك بالنعمة دي 
لو زي حالاتي مدحوك عليك ... ادعي ربنا يرجعلك النعمة دي تاني ...و ثق في رحمته رحمته كبيرة قوي ... هو خللقنا عشان يرحمنا و الله :)

تحياتي ^_^

عصر العلم

مكانش ينفع يبقى عندي مدونة , مكلمش فيهاعن عصر العلم
مكانش ينفع بعد كل الي انا حاسه النهارده ده مكلمش عن الي خلاني احس بالفخر و الثقة و الحب و الامل ده ^_^
اسرة عصر العلم
اكتر حاجة مهمة في حياتي حتى الان 
اكتر مكان بحس فيه بالامان 
اكتر مكان بحب اشتغل فيه
مفهوم جديد للعمل التطوعي 
المفهوم العام و امعروف انه اللعمل التطوعي عمل خير و مساعده فقراء و ايتام و كده 

اسرة عصر  العلم غيرت المفهوم ده تمااااااامااا
عارف لما تبقى بتشتغل في عمل تطوعي .. و انت عارف ان ده حلمك .. انت ماشي بخطى ثابتة لتحقييق الي نفسك فيه  و هو نهضة بلد 
اسرتنا دي بتعمل كده
اسرة طلابية و في جامعه قناة السويس بس .. بس انا متاكد و الله ان الشباب الي فيها هو الي هيقود بلدنا ناحية التغيير 
هو الي هيخلي مصر دولة متقدمة 
شباااب كتييير عنده حلم ..ورؤية .. و هدف ... شباب طموح .. شباب متحمس .. متعاون ... مبدع ..
كل الصفات الي انت هتحتاجها عشان تعمل نهضة موجودة في مكان واحدة
والصفات الناقصة بنتعلمها من بعض ... او في بعض :D
ورغم ذلك مبنزعلش من بعض ..  بيحصل مشاكل طبيعي ... بس بنرجع بعدها نتصالح و نبقى احسن و افضل من الاول 
اسرتنا دي شفت فيها حاجات كتيرة مكنتش تخيل اني اشوفها 
كان في في غزوة كده في عهد عمر بن الخطاب القائد بعت طلب منه امدادات ..راح باعتله 4 جنود ... قاله بقولك وضعنا صعب و عايز امدادات و محتاجين جنود تقوم باعتلي 4 جنود ؟!!
قاله لقد ارسلت اليك 4 رجال يعادلون جيش ...كل رجل منهم بالف
انا شفت في اسرتنا دي شباب ... هيكونو رجال بالف 
راجل قادر على تحمل مسئولية كاملة و تقيلة و هو ليه عنده 20 سنة ... و بياديها على احسن وجه 

شفت فيها بنات ب 100 راجل ... بنات يعتمد عليهم في اي حاجة و يقدرو يادوها احسن من رجالة كتير

شفت فيها قادة ... بدون دورات اعداد قادة
شفت فيها شخصيات بتتعامل بروعة ..تحت اي ضغط ...بدون اي دورات تعامل مع الضعوط 
شفت فيها مصر الي نفسي فيها 
شفتي فيها امتي زي ما نفسي اشوفها 

وبعد ايفينت النهارده ... بجد فرحان بيه قوي ... فرحتي لا تكاد توصف .. عارفين لييه؟
لان الاسرة دي كانت فكرة بداها هاني واتحولت لاسرة قايمة على فكرة و حلم ... نفسنا نخلي ده عصر العلم ... نفسنا مصر تبقى دولة متقدمة بينا .. باننا نحبب الناس في العلم تاني 
بعد ايفينت النهارده .. كلمة سمعتها من كذا واحد ...مكنتش عايز اروح من الكلية النهارده 
فرحتي بيها لا تكاد توصف 
الناس نفسها تفضل قاعدة في الكليةتتلقى علم .... ده نجاح رهيب والله  كل واحد فينا حاسه النهارده 
بعد كل ايفينت بنعمله الناس بيتزرع عندها حتة جديدة ببقى فرحان بيها جداا
بحس اننا ماشيين بخطى ثابتة ناحية تحقيق حلمنا و هدفنا ...
وبحس اني كبلال لقيت الحاجة الي بتساعدني اني احقق اهدافي .. ,وبكون سعيد جدااا بيها 

اسرتنا دي روح مش هتلاقيها في اي حتة تانية ... كل الي فيها بيخاف لى بعض و بيحبو بعض بدون اي مصالح او حاجات شخصية ... كلنا بنساعد بعض و بندعم بعض
عايز تدور على المكااااان الوحيدة عالاقل عندنا في الاجامعه الي بيطبق حاجة اسمها الدعم ... تعالى عصر العلم
والفضل في ده يرجع لله ثم علا ... زرعت جوانا المفهوم ده ... بقيت تلاقي ان لو اي حد في الاسرة عمل اي حاجة حتى لو صغيرة الف واحد بيشكروه عليها .... طب بيشكروه ليه؟ عشان هما عايزين منه المزيد 

كمان كلنا بنستحمل بعض ... طريقة التعامل بينا مشوفتهاش عند حد تاني بصراحة 
الخلاصة ان عصر العلم دي تركيبة فريدة ... مش هتلاقيها في اي حتة في مصر غير بس عندنا .... والتركيبة دي خلال فترة قصيرة قوي ... هتكون هي الي غيرت بلدنا دي للاحسن 

قد تكون التدوينة دي عادية ..ومش مبهرة ولا حاجة ...بس سامحوني  انا فعلا كتبتب الي كنت بحسه او بيجي في دماغي 
و عارفين ... والله كان بيجي في دماغي حاجات اكتر من كده بكتييييير ...وكل شوية اقول هبقى اكتبها في التدوينة ... جيت اعمل التدوينة ..كل الافكار راحت :D :D

المهم انا عامل التدوينة دي عشان اوصلكم حاجة 
قد ايه احنا متميزين 
قد ايه احنا مختلفين 
قد ايه انا فخور اني شغال في اسرة كده 
عايزكو بعد كده لما تسمعو اسم عصر العلم اعرفو ان الموضوع مش عادي ... الموضوع وراه حاجة ...وبيتحرك بينا ناحية نهضة بلدنا ولو حتى 1 سم ... بس بيتحرك ..وده في حد ذاته فخر لينا كلنا .. اننا نكون ساعدنا في نهضة بلدنا و تغيير مفهوم العلم عند جيل امل .. لعل و عسى ربنا يتقبلها مننا و سجعلها لنا صدقة جارية و علم ينتفع به ... لعل و عسى ندخل الجنة بسبب نيتنا دي ... لعل و عسى النبي يفرح بينا اننا همنا على اننا نحقق نهضة لامتنا ..

ادعولنا كده ربنا يثبتنا عالنجاح ده و نقدر نستمر فيه ...و نحقق الي احنا عايزينه
اسف لو طولت عليكو او صدعتكو  وشاكر جداا لاهتمامك انك تقرا تدوينة ليا ده فعلا شيء يسعدني :) 

عن العمل ... والعلاقات الانسانية

السلام عليكم و رحمة الله و بركاته
رجعتلكم تاني بعد غياااب .. اكيد كنتو مفتقديني .. انا عارف :D

المهم  زي ما انتو شايفين هرغي النهارده عن العمل و العلاقات الانسانية :D

كتييير قوي نسمع كلام زي .. الشغل شغل و الهزار هزار
انا في الشغل ما اعرفش ابويا ....
واشياء من هذا القبيل

والي بيقولها بيقول من وجهة نظر ان كده صح و ان ده في مصلحة الشغل

هكللمكم عن وجهة نظري انا بقى

بصو .. شيء اساسي طبيعي جدااا ان لازم يكون الشغل شغل و الهزار هزار
وان الشغل مالوش دعوة بالعلاقات الشخصية وان عادي جدااا اننا نختلف مع بعض في الشغل ...و نقطع بعض و نولع في بعض كمان ..وده لا يفسد لصداقتنا اي حاجة :D

طيب بالنسبة للانسانيات .. يعني ايه
يعني هل الشغل برده يطغى عالعلاقات الانسانية ؟؟
يعني ايه برده
يعني مثلا ..لو حصل موقف اثناء الشغل .. الموقف ده انسانيتك بتقولك تعمل حاجة ..والشغل بيقولك اعمل حاجة تانية
ابسطهااالك و اضربلك مثال
يعني مثلا لو انت مدير شركة ...وفي موظف عندك ... كان مطلوب منه مهمة معينة ... وبعدين مثلا حصلتله مشكلة ماا ... اي ظرف ..معرفش بسببه يعمل المهمة دي ...ظرف قهري... هو قالك انا عندي ظرف قهري ...و محددش ..بس انت عارف انه صادق و انه موظف مجتهد ومش هيكدب ... هتتعامل معاه ازاي
قدامك حل من اتنين... اما انك تعاقبه بخصم مثلا  لانه اثر بالسلب عالشغل و ممكن لو انت في شركة كبيرة ممكن يكون خسرك فلوس كمان بسبب المهمة بتاعته دي
او انك تتقبل منه عذره و تكلفه انه يعيد الشغل تاني في وقت اقل مثلا
او لو ظرفه قوي ممكن تخلي حد تاني يعمل الشغل و تديله مثلا اجازة يومين لغاية ما يتحل مشكلته و يبقى قادر يشتغله

فكر شوية في الاجابة .. فكر انت هتتصرف ازاي لو انت مدير شركة مش انت دلوقتي .. يعني ممكن جدااااا التاخير الي هو عمله ده يخسرك مبلغ حلو ... و احسبها و شوف قرارك

انا هكلمكم عن قراري

بالنسبالي  انا هتقبل جدااااا عذر الموظف ده ... احتى لوهو مش متميز ولا كويس جداا في ادائه في شغله ..طالما وثقت في صدقه
الموضوع بكل بساطة يعلق باحترام الانسان .... الموظف ده لما يحس اني احترمته و قدرته .. و تقبلت عذره .. و يا سااام لو قلتله كلمتين حلوين مثال ربنا معاك .. ربنا يعينك .. شد حيلك ..ولا يهمك .. شغل فاخر كده :D هيزداااد انتمائه للمكان الي هو كان فيه .. هيزداد حبه ليه و رغبته في العمل بيه
هيرجع  تاني للشغل بعد ما يخلص مشكلته و هو كله حماسة انه يشتغل .. هيشوفهالي جميلة اني استحملته و تقبلت عذره ..هيرجع و كله اصرار انه يعوضني عن ده
لو موظف متميز فهيحافظ على تميزه و هبقى كسبت انتمائه للشغل بصورة قوية جدااااا .. يعني هيبقى صعب اني اخسر حد متميز زيه كده
لو موظف عادي انا متاكد انه هيتحول موظف متميز .. وهبقى برده كسبت انتمائه للشركة
من وجهة نظري الموارد الحقيقية لاي شركية او مؤسسة عموما هو مواردها البشرية و ليست المالية اطلااااااقااا
يعني لو شركة خسرت كل مواردها المالية ... بس مدير الشركة كاتن قدر يكسب انتماء الموظفين للشركة صدقني و الله هتلاقي الموظفين قبل المدير  هما اللي بيحاولو يرجعو المكان ده تاني
ليه .. لان الفلوس بالنسباله قيمتها تضائلت قدام انتمائه للشركة .. صعب يلاقي مكان تاني يحترمه كده .. انت كسبت موظفك كانسان قبل ما تكسب مجهوده ..وده اعظم مكسب

مثال عملي على نظريتي شركة جوجل
الي عايز يتفرج شركة جوجل بتتعامل ازاي مع الموظفين بتوعها يتفرج على حلقة برنامج خواطر 8 بتاعة جوجل .. الحلقة 8 واحدومائة صفر

الشركة بتحاول تزرع في الموظفين بتوعها حاجات مهمة قوي ...اهمها انتمائه للمكااااااان . للاسم ... انه يحس براحته في شغله
انه يحس بقيمته كانسان .. يبقى شغله مش مجرد حاجة بيكسب منها فلوس .. لأ شغله حياته .. هيحاول يبدع فيه .. يطور فيه
جرب تروح لاي واحد شغال في جوجل قوله تطلع مالشركة و هتروح شركة تانية و لو بمرتب اكبر ... اعتقد بنسبة كبييييرة جدااا انه ممكن يرفض لنفس الاسباب الي قلتها قبل كده


نفسي بجد يبقى القيمة الاساسية في اي مؤسسة هي احترام قيمة الانسان .. ناوي احققها في شركتي ان شاء الله و هخلي جوجل مثلي في ده .. الموظف الي اختار انه يشتغل معاايا ... له مني كل الاحترام و التقدير .. لشخص قبل ما يكون لشغله ... هدلعه :D

اتمنى تكونو استفدتو حاجة مالهري الي فوق وحاولو تطبقو الموضوع ده في حياتكم .. مش لازم تبقى مدير شركة عشان تعمل كده ...
جربها مع واحد صاحبك .. اقف جنبه في زنقة ... استحمله لو هو مدايق ... انت مدير من دلوقتي على فكرة ... مدير لحياتك الشخصية .. حاول تطبق فيها القيم و المباديء الي تحس انك محتاجها .. عشان تعيش سعيد و تكسب الناس الي حواليك
تحياتي :)

ابو جلابية

مبدايا ... شايف واحد بيقول هو عم الحج ده داخل سخن كده ليه وكل شوية تدوينة و صداع
بص يا سيدي معلش استحملني بس خليك فاكر انك جيبت هنا بارادتك ^__^

ثانيا انا هكتب فعلا الي يجي في بالي بس ... الخواطر فقط ..وفي وقتها
يعني ممكن تلاقين قاعد بالثلاث شهور مبنزلش حاجة ..وممكن في اليوم انزل اكتر من تدوينة ..عادي بتحصل والله :D

المهم بقى ..خلينا نركز في  موضوعنا الي مالوش لازمة ده :D
يوم الجمعه الي فات ده يوم مميز في حياتي ...عملت فيه حاجة جديدة و ترتب عليها حاجات جديدة فجديدة و احاسيسي جديدة برده

نزلت اصلي الجمعه زي باقي البشر و رجعت
المفروض ان يوم الجمعه ده عني فيه كذا معاد .. عندي شغل في رسالة ... عندي اللمة ... معاد اخير كده في قصر الثقافة ...وده مكانش معمول حسابه
المهم .. قلت انا هجدد الجمعه دي ...كنت زهقاان جداا بصراحة ..فقلت ايه بقى ...هتحرك كل مشاويري بالجلابية

وعلى بركة الله
كتبت كده عالفيس لقيت برده ناس كتير اتحمست و قالت ماشي و هتنزل زيي .. بس نزلت لوحدي في الاخر
المهم رحت رسالة بالججلابية ...ونزلت وزعت بالجلابية ..شكلي كان عجيب بامانة ..الناس كلها نازلة بتيشيرتات الجمعية و ايديهات و شغل نضيف كده و انا نازل بالجلابية

وبعدين رحت اللمة بالجلابية ...كان شكلي اعجب بصراحة
موضوع اللمة عن رواية اولاد حارتنا بين ازدراء الاديان و حرية الابداع
الناس كلها قاعدة بتتكلم و لابسين كاجوال و حاجة شياكة كده
وانا رايح بالجلابية ...وبدقني اللي مكسل احلقها ..وبالشبشب ...اعتقد الانطباع الاول وصل :D

المهم خلصت اللمة على خير مع بعض الكومنتات الظريفة من صحابي ... الي يقولي كوباية لبن ...والي يقولي نقاء و بياض ...وحاجات تانية كتير ...المهم برده انا كنت مستمتع ^__^

وبعدين كان في حفلة في قصر الثقافة عاملها حزب الحرية و العدالة عن نصرة النبي
النية كانت اني اروح اتفرج بس و الله مكنتش ناوي احضر للاخر ... بس الجو شدني و قعدت
طبعا دخلتي المسرح ليها هيبتها ... المسرح مليان بدل وانا داخل بجلابية و شبشب ...تميز مفيش كلام ^__^

اخترتلي كرسي حلو كده في تاني صف في الاول  قعدت عليه ...لقيت مجموعه كبيرة من فنانين التشكيلين بتوع قصر الثقافة جم و قعدو جنبي ...سابو المسرح كله ال800 كرسي و قعدو جنبي!!!
ما علينا
المهم بقى خدت بالي من بعض النظرات المستنكرة ...مين ده !!! ايه الاشكال دي ؟!!... ده منظر !!! ...حاجات من هذا القبيل  تحس انه بيبصلك بعينه بس .. بس تقوله الرسالة وصلت يا كبير
لقيت نفسي اتبسطت اكتر بصراحة بعد ما النظرات دي من "المثقفين" دول ... انا كبلال اتبسطت بصراحة :D

قعدت اتفرجت عالحفلة كانت جميلة ...المهم كانو جايبين واحد كده ...وحبك يصور الكليب بتاع اغنيته الجديدة في قصر الثقافة ...قالك الكليب هيتصور في القصر و هيتذاع عالقنوات و عالنتو هيتقال انه اتصور في قصر ثقافة الاسماعيلية ..والناس وقفت و هو غنى ..والكاميرا عدت الناس كلهم ..وانا قاعد في الاول ...كنت منور والله بالجلابية ....تخيل انك اليوم الي قررت تنزل فيه بالجلابية و الشبشب ...تتصور في اغنية في كليب في مكاااان يعج بالبدل ....
و التلفزيون يصور الحفلة و تكون انت في مقدمة الصور لانك قاعد في الاول ...احساس بالتميز كده ^__^
حسيت اني ضاحك عالناس كلها ... الناس كلها فاكراني شيخ وانا مش شيخ اطلاااااقااا :D

اخر فقرة في الحفلة كانت بتاعة فريق الموسيقى الشرفية بتاع القصر ...فريق رائع وفيه مواهب عديدة و امتعوني بصراحة
وانا لما بستمتع بندمج بصراحة يعني :D

في واحدة كده غنت اغنية وطنية لام كلثوم مش فاكر اسمها ايه بس انا اندمجت جدااا  و قعدت اسقفلها برضه و غنيت معاها
وفي واحد غنى اغنيى حلوة برده قوي و صوته كان رائع اندمجت معاه
و غنو عشان لازم نكون مع بعض و دي انطلقت فيها بقى :D
حافظها و قعدت اغنيها معاهم و اسقفلهم و كده

واتفرج على نظرات الناس بقى
الجلابية و الدقن و الشبشب ...وبيغني
وبيسمع موسيقى
وبيسقف لناس بتغني
شيوخ اخر زمن!!1
شيخ تايواني!!!
وديتو الدين في داهية
انا حاسس ان ده لسان حال كل الي كان جنبي و ورايا و قدامي
اه كنت بعاكس العيال الصغيرة كمان :D
بس والله كنت مسمتع
وروحت وانا عندي احساس مختلف كده ...اني النهارده كنت متميز
نزلت بلبس مختلف رحت بيه اماكن مش متعود اروحها بيه
وحضرت حاجة جديدة
و اشتغلت كل الي شافني بالمنظر ده ^____^

جربو كده اعملو اي حاجة جديدة في حياتكم ..... هتستمتعو و الله..وطالماا قررتم انكم هتعملوها ..و عارفين انها جديدة ..ويا سلااااام لو حاجة مجنونة كده .... متخليش بقى راي الناس ياثر عليك فيها
المهم انك تكون مبسوووط
طالما مبتعملش حاجة عيب ولا حرام :D

فتكو بعافية :D