تفريغ .. - معدلة -

كلام بالعامي تاني ... و حشني والله :)

الصراع الدائم بينك و بين نفسك ,... تكمل عشان البلد دي و لا تسيبها و تهرب ؟! 

مش عارف الصراحة ,, كل يوم بالف حالة .. 

فكل ما ابص على واقع البلد .. مش واقع السلطة .. بل واقع الناس 

الناس بقت وحشة قوي والله .. بقى صعب جدا انك تلاقي حد محترم ,, عارف ربنا بجد ملتزم .. متدين . عقلاني .. خلوق .. مبيشتمش .. منصف ... و غيرها من الصفات الي المفروض تكون موجودة في الواحد عشان يكون بني ادم محترم يعني 

لا دلوقتي احنا بقت اخلاقنا زي الزفت .. السفالة و قلة الادب بتجري في دم الناس ,, و كل شوية تلاقي نفسك بتتشد للمستنقع ده و بتحاول تطلع ! 

تخيلوا ان الواحد بقى بيعاني عشان يكون بني ادم نضيف ؟ ... بقيت بعاني عشان امسك لساني من الشتيمة ! و ساعات بقع و بعدين ارجع اعاتب نفسي و اقول لأ مينفعش و هكذا ... 

بقيت بعاني عشان لما اسمع حاجة قبيحة حواليا اسيبها و امشي ... قباحة افيري وير !! 

بقيت بعاني عشان اقول رايي... اه و الله ..  مبقاش عندنا تصنيفين بس .. لا 5000 تصنيف 

وكل واحد مستنيك تقول رايه هو مش رايك انت .. و لو مقولتوش يبقى انت مش معانا انت مع الناس التانيين 

تقريبا بقيت مضطر تخسر كل الي حواليك لانهم مش عايزين يحترموا رايك مش عشان رايهم ,,, هتصفى في الاخر عليك انت و 4 او 5 مش كلهم معاك على نفس الراي بس كلهم بيحترموك 

و عن ناس انت بتعتبرهم اصدقائك و تلاقيهم  رايهم مخالف جدا  لرايك ,,و بتحاول تقول ده راييه و هو حر فيه ,, بس بتلاقي ان ده مش رايه 

صاحبك و انت عارفه و مضحوك عليه ,, و هو مش عارف انه مضحوك عليه و في النهاية يقولك دي اراء .. فتلاقيه بارائه دي بيسخر من الاخوان الي هما ابوك و امك و اخواتك ,, و تلاقي نفسك مضطر تستحمله لانه صديقك ؟!! طب ازاي 

و كتير بقول في داهية الصداقة يا عم بس و الله بيرجع يصعب عليا ,, ما هو لو ده رايه هو الي من دماغه هو هقول عادي زيه زي غيره . 

اغبى حاجة في الدنيا دي انك يبقى حد ضاحك عليك و مفهمك انك فاهم ,, بدعي ربنا انه  عمري ما ابقى كده ,, عشان كده عمري ما سلمت و لا هسلم دماغي لاي حد ,, حتى لو هفكر غلط 

عن معاناة انك يبقى عيلتك كلها اخوان ( و ده فخر ليا )  ,, بس  مضطر تسمع الشتيمة و التهزيق فيهم كل شوية و  يوم ما تدافع عنهم يبقى انت كمان اخوان ! (و دي مش تهمة ) 

بحس اني نفسي افجر البلد دي كلها و اولع في كل الناس الي اعرفهم بيشتموا في الاخوان و اخسرهم و اكرههم كمان !! 

جرا ايه يا بشر .! انا مقدرش ادافع عن ابويا و امي و هما بيتشتموا و لا ايه !! ولا انتوا خلاص قلة ادبكم و ريحتكم فاحت ! 

خليني اشتم في ابوك و امك كده ... حاولت اعملها و الله بس مقدرتش .. لقيتني بقول ذنبهم ايه الناس الغلابة دول ان ابنهم طلع كده !! 

ولا عن هاني ,, بيقولك مبتحسش بقيمة الحاجة غير لما  بتتحرم منها ,, المثل ده اثبت نفسه و بقوة حتى في البشر 

انا  فعلا مش عارف اعيش عيشة طبيعية كده وانا  عارف انه في السجن 

كلمة تعالوا نخرج مقولتهاش في الشهر الي فات ده كله غير مرة واحده و قلتها و انا مكسوف و روحت زعلت من نفسي جدااااا 

و بقيت بس كل الي اعمله اني انزل اكل بره لان الاكل بره وحشني ,, لغاية ما هاني يرجع نطلع نخرج و نهيس تاني بقى 

كمان كان بيبقى الحد المحترم الي بيقف جنبك و يحسسك انك مش لوحدك في الدنيا دي ,, العزوة مطلوبة برده 

ربنا يطلعك بالسلامة يا هاني :) .... و حشتني و الله 

زمااان كان عندي مشكلتين مع نفسي بعاافر عشان احلهم و مش عارف .. و هما اكبر سبب في اي تغير في حياتي للاسوأ اني مش قادر احلهم 

تخيلوا بقى ان المشكلتين دول دلوقتي بقوا 3  و 4 و 10 و كل يوم بكتشف مشكلة جديدة و مش عارف احلها ,,, تحس مرة واحدة كده ان كل حاجة عليك و انت حتى رضا ربنا غاية مش عارف تنولها ,, احساس بسخط ربنا عليك في كل حركة و كل خطوة بتعملها في حياتك حياتك كلها غلط في غلط و ياما رجعتله 

يئست من رحمة ربنا ؟! لأ بس تعبت .. هفضل لغاية امتى اغلط و اتوب و اغلط و اتوب ,, منا لازم ابقى بني ادم محترم بقى بيغلط بس في حدود المعقول !!!

كمان نقطة ان كل الناس فاكراك حاجة كويسة او واخده عنك صورة ذهنية حلوة و انت اصلا مش نافع (من بره هالله هالله و من جوه يعلم الله ) بتقسوا عليك لدرجة انك كرهت المدح ,, بقيت بدايق لما حد يمدحني ,,, ارحموني و المصحف انا بني ادم زبالة ! 

هيجي واحد يقولي ما ده دليل على انك بني ادم كويس .... تاني ؟!!! 

عايش في مجتمع راضي بالدني من كل شيء ,,, اقل حاجة في كل شيء هو راضي بيها ,, و يشوف الاحسن و يقعد يمصمص في شفايفه 

مش عارف تقوم نفسك و تخليها نفس مستوية قويمة ... و مطلوب منك تغير غيرك و تصلح بلدك و تنفع امتك ؟؟!! طب ازاي حد يقنعني 

كل شوية تحس ان ربنا حاطك في المكان ده في الوقت ده  عشان عايز منك حاجة وانت كل شوية تثبتله انك متستحقش و مبتحققش اي حاجة من الي هو عايزها 

و بعدين ترجع تعافر مع نفسك و في لحظة صفا تقول ربنا هيسالك عن جهدك و تشتغل على نفسك و تحاول تنفع غيرك
و بعدين تلاقي مفيش فايدة ,, لا انت اتغيرت و لا غيرك اتغير ,, فتحس انك بتضيع وقت !
طب اعمل ايه .. مش عارف ... محتاج حد يقف جنبك و مش لاقيه ؟ يمكن ...

ولا عن باسم يوسف ... اتفرجت عليه بحسن نية و الله ,, و بدون حكم مسبق و عايز اعرف هيعمل اييه ......بس  حقيقي مقدرتش استحمل اني اكمل الحلقة ! سبتها و مشيت
سفالة و قلة ادب منقطعة النظير ,, مش عارف ازاي في بنات بيستحملوا الكلام ده لأ و بيشكروا فيه
امما الولاد فحدث بلا حرج ,,, شفت ولاد بيقول باسم يسوف بيقل ادبه و ده بيناسبني و بيمثلني و بيعبر عني !؟ انت عارف كده و مبسوط يعني ... طيب  تمام

ضحكت وانا بتفرج عليه ... اه ضحكت ,,, و بعدين لقيت الموضوع مش مستاهل ,, يعني انت بتتحمل سخف ساعه و نص عشان تضحك 10 دقايق ربع ساعه ؟!  للدرجادي بقيت محتاج الضحكة ؟!... اه و الله محتاجها !

ولا عن الناس الي مبقتش شايفة في الدنيا دي غير نفسها ,,, شايف كله وحش ,,و و هو بس الي فاهم ,, بس هيقولك انا مش فاهم ,,, فتصدقه تيجي تبص على كلامه او افعاله ,, هتلاقيه بيتعامل على انه البوب الكبير بتاع الدنيا دي ! طيب يا عم البوب

ولا عن محمود سعد .. الشهيد الي مات و هو زعلان مني ,, و دي اكتر حاجة ماثرة فيا في وفاته ,, عرفت انه زعلان مني او بيعتب عليا من اخويا ,, و مفكرتش اروح اعتذرله او افهمه وجهة نظري او حتى ابينله اني مهتم ,, لا قلت هو حر ,,, بس و الله مكنت اعرف انك هتموت شهيد يا محمود

ولا عن احمد السيد .. الي بداتوا حياتكم بتحفظوا قران مع بعض عند الشيخ احمد عبد الحي في مسجد بلال بن رباح
بص هو وصل لايه و انت لايه
هو بقى عامل زي السمكة لما بيطلع بره الجامع بيموت
و انت بقيت بتنزل الجامع بظروفها !!
هو ختم القران و مات شهيد ,,و انت نسيته .

الرغي كتر ؟ كفاية كده دلوقتي و معلش صدعتكم و قرفتكم و نكدت عليكم .. انا اسف :)

ملحوظة مهمة : كان في هنا شتيمة ,, ترددت اكتر من مرة امسحها ولا لأ لأني وانا بكتب طلعت بعفوية و مرضيتش امسحها عشان الناس تفتكر اني مبشتمش و كده
بس في النهاية لقيت ان ده فعل خطا لزم الاعتذار عنه  و المحافظة على الاخرين من انهم ميتاذوش ,, و التنويه ده عشان اوضح اني شتمت في التدوينة بس رجعت في صوابي و استغفرت ربنا :)