قالك خصوصية ؟!!

-عارف يا زكي من اهم المشاكل الي بنعاني منها حاليا 
هي  ضياااع مفهوم الخصوصية 

-خصوصية ؟!! ... خصوصية مين يا ابو خصوصية ؟!!

- يا عم والله بتكلم بجد ,, خصوصية يعني انت يبقى ليك خصوصية ,, يعني في حاجات بتاعتك انت مش من حق حد يعرفها غيرك 

- ليييه بقى ان شاء الله ... هو انت بتعمل حاجة عيب ولا حرام ؟؟!!

- لا اله الا الله ... و هو انا اي حاجة عايز احتفظ بيها لنفسي ومش عايز حد تاني يعرفها تبقى عيب او حرام ؟!!

- اه والا ايه الي مخليك عايز تخبيها من الناس ؟!! 

-يبني افهم !!... من حقك انك يكون ليك اسرار بينك و بين نفسك ممكن تكون حاجات انت بتخططلها ,, ممكن تكون كلمات ليها معاني معينة بالنسبالك ,,, ممكن تكون علاقتك باشخاص معينين ,,, و متعصبنيش بقى يا عم انا كده هقولك على خصوصياتي عشان تقتنع !!! :D 

-ايوة و ايه الي يمنع بقى انك تقول الحاجات دي للناس و تعرفهالهم يعني ؟!!
ما هو طالما كل ده in puplic و مفيهوش Feelings  ,,, سووو واااات ؟!! (so what يعني ,, معلش زكي الانجليزي بتاعه بعافية حبتين :D )

-لأ ساعات كده في حاجات انا ك عبده بدايق لما حد يعرفها غيري زي الي قلتهالك دي 
ده غير انها غالبا هكون انا بس الي فاهمها ,, ولو قلتهالك و فهمتها فده تعدي منك على خصويتي 

- تااااني هيقولي خصوصيتي .. يبني مقولنا مفيش حاجة اسمها كده 

- طب بص يا رمضان انا هقولك على حاجة هل مثلا انت ترضى دلوقتي اني اجي اعرف كل حاجة عن حياتك ,, كل كبيرة و صغيرة .. كل حاجة كل حاجة ؟!!

- طالما انت صاحبي و انا واثق فيك ,, و مفيش حاجة غلط بعملها ايه المشكلة 

- شوفت ,, اديك قولتها اهو انك تكون واثق فيا ,,, تخيل مثلا مثلا يعني انك قلتلي انك داخل دلوقتي على تحدي معين او على مرحلة معينة في حياتك و مرحلة جميلة و حلوة بس لسه في اولها و قلتلي ادعيلك فيها حاجة وحشة دي ؟!

- لأ طبعا 

- طيب قوم ايه بقى ,, جيت انا رحت بقيت بقول لكل الناس الحقوا ده زكي (او رمضان .. مش هتفرق ) داخل على مرحلة جديدة في حياته و هتبقى مرحلة جامدة وجميلة حلوة و هيعدي و و .. هتبقى مبسوط 

- ممم مش عارف بقى ,, على حسب ساعتها المرحلة دي عاملة ازاي

- طب بص يا عم عشان ننهي الكلام يعني 

كل واحد فينا عنده حاجات في حياته ,, مش من حق اي حد يتطفل عليه و يعرفها 
ممكن تكون جملة ,, ممكن تكون كلمة ,, ممكن تكون حاجة انت عايز تعرفها في نطاق معين و مش عايز حد خارج النطاق ده يعرفها 
ممكن تكون ورقة انت لازقها عالحيط عندك ,,, جملة كاتبها في كشكول ,,, رسمة معينة بتعني لك الكثير ,,, ساعات ممكن يكون رايك حتى بتعوز انك تنشره في نطاق معين ومش عايز حد بره النطاق ده يعرفه ...

- يا عم ليييه ما حنا في عصر الحريات دلوقتي و كل واحد بيقول الي هو عايزه و مبيهموش ,, 

-يبني افهم ,, ساعات في ناس انت عارف انهم هيفهموا رايك و يناقشوك فيه بموضوعية
وفي ناس تانية مش هتفهم رايك و هتفسر كلامك على الناحية الي هي عايزاه 
وكل واحد ياخد من كلامك الي هو عايز يفهمه و يعتقد ان هو ده الصح و الكلام ده يتحسب سواء ليك او عليك
انا بقى مش عايز كده ,,, انا عايز الكلام الي اقوله ناس معينة الي تسمعه و تشوفه و تفهمه و بس كده الباقي مالوش فيه 

- تمااام يا واد اقنعتني ,,, طب و حوار بقى ان في حاجات ميعرفهاش غيرك دي و بتسميها خصوصية 

- بص هضربلك مثال صغير 
ممكن يكون انت عندك مشكلة كبيرة بتؤذيك جدا و بتحاول تحلها بكل الطرق 
بس مش عايز حد يعرف بالمشكلة دي غيرك اكيد الواحد فينا مش هيبقى مبسوط انه يمشي ينشر غسيله عند الي يسوى و الي ميسواش ؟!! 

- اه تمام عندك حق 

- بس فساعات بقى تلاقي ناس قافشة تعرف مالك و في ايه و ايه المشكلة الي عندك 

- ايوة يا عم مهما نيتهم خير عايزين يساعدوك 

- يا عم على عيني و على راسي و دي حاجة احترمهم عليها جدااا بس نفسي يفهموا اني طالما مقلتش يبقى مش حابب حد يعرف 

-نظرية بردوا 

- كمان ساعات عشان تحل المشكلة دي بتحتاج تكتب حاجات تفكر بيها نفسك دايما بحلها 
ساعات بتحب تحكي مع نفسك عن المشكلة و اسبابها ,, تكتب كام جملة يحفزوك انك تحلها على خير 
تلاقي ناس بقى تفتح كشاكيلك عادي ,,, او تدخل اوضتك  بدون اذنك عادي , او ويفتح شنطتك بدون اذنك عادي ,, او  يقلب في موبايلك برده عادي 

- لا مالهومش حق :D

- كمان في حاجة ,, ان ساعات صاحبك عشان هو صاحبك بتلاقيه قافش انه يعرف كل كبيرة و صغيرة عشانك 
وانا كنت كده زمان ,, بس لما كبرت شوية و اكتشفت موضوع الخصوصية ده لقيت ان فعلا من حق كل واحد يبقى عنده مجموعه اسرار يحتفظ بيها لنفسه مش لازم اكون انا رخم يعني عشان صاحبه 

- طب ما انت كده مبتساعدوش لو عنده مشكلة ,, ما جايز يكون عنده مشكلة و محتاجك فيها بس انت مش عارف 

- لا اقولك بقى تعمل ايه ,, انت تعرفه انك حاسس انه عنده مشكلة ,, و مش هتتطفل عليه و تجبره يحكيهالك , بس فهمه انك جاهز لمساعدته في اي وقت يحتاجلك فيه ,, صعب كده ؟!

-لا عداك العيب و قزح :D D: 

-كمان حاجة ,,, ال Faccebook ده بقى بلوة لوحده
تلاقي ناس كل علاقتك بيكم كانت انكم اتقابلتو لمدة 30 ثانية وقالك سلام عليكم و اسمك ايه و عرفتوا بعض 
باعتلك ادد عالفيس بوك 

- يا عم وايه المشكلة ؟! ما تضيفه 

- يبني هو حسابي عالفيس مش اسمه حساب "شخصي" واخدلي بالك انت من شخصي دي 
في كلام بيتكتب فيه  لصحابي مينفعش عامة الناس  تشوفه 
وفي صور بيني و بين صحابي مش هبقى مبسوط لو حد معرفوش شافها 
او حتى حد علاقتي بيه سطحية 
و في النهاية انت لو مضيفتوش يزعل !!! لأ و الانيل تلاقي ناس متعرفهومش اصلا باعتينلك ادد !!! طب ده انا اضيفه عندي بامارة ايه !!!

- ممكن يكون عندك حق فعلا ,, بس زي ما بيقولو معرفة الناس كنوز 

- تمام معرفة الناس كنوز بس انا ممكن اتعرف عليه و نبقى صحاب و بعدين اضيفه عادي معنديش اي مشاكل ,, انما اضيف واحد مفيش بيني و بينه اي علاقة ليه 

- تمام انت صح 

- اخيييييراااااا اقتنعت يا هنيدي 

- اه يا عم نسبة كبيييرة من كلامك  صح 

- طيب تمام الحمد لله 

- مقولتليش بقى ايه لازمة الحوار ده كله ؟!

- افضل احتفظ بالاسباب لنفسي 

- ليه حد زعلك في حاجة او اقتحم عليك خلوتك ,, قول يبني متتكسفش ;)

- يااااااادي النيييييييلة 
 مفيش فاااايدة :D