انســـــانيـــات

• كنت اتكلمت قبل كده عن العلاقات الانسانية و اهميتها ,, داخل العمل  في حاجة ثانية بتحصل للاسف مع ناس كتير ,
  انشغاله بالعمل بيخليه يفقد كل علاقاته الانسانية خارج العمل ,, في ناس بسبب الشغل بتنسى اهلهم , ازواجهم ,, عيالهم ,, صحابهم ,, قرايبهم
  في ناس الشغل بيحولهم لمكنة ,, هو عايش عشان بيشتغل ,, بيختلف مبرر الشغل ,, في ناس بتشتغل عشان تجيب فلوس , و في ناس بتشتغل عشان فكرة ,, في كل الحالات ,, مبشوفش اي مبرر يخلي اي شخص يدي حياته كلها للشغل ,,, بيضيع متعة الدنيا ,, بيفضل عايش طول الدنيا متكدر و حاسس بالمعاناة ,, مع ان الحياة حلوة بس هو الي خد الخيار ده !!!
  شغلك جزء من حياتك ,,, متديلوش اكتر من جزء من يومك ,,, اهلك ليهم حق عليك ,, اصحابك ليهم حق عليك ,, مراتك ليها حق عليك ,, ولادك ليهم حق عليك ,, مشكلة من المشاكل الي بيقابلها اغلب الاطفال و بتاثر في تربيتهم ان دايما الاب فاهم ان وظيفته في الحياة انه يشتغل و يوفر فلوس لعياله ,, فبيتحول الاب بالنسبة لولاده الى مجرد بنك ,, لما اعوز فلوس اطلبها منه , , يجي بعد كده يدايق ,, طب ما انت الي اخترت كده من الاول ,, مديتهومش حقهم من الرعاية و الحنان و الحب الي هما محتاجينه منك كاب ؟!!
  في ناس بتشتغل و تنسى كل صحابها ,, تنسى كل اللحظات الحلوة الي كانت بينهم ,,تتحول علاقته باصدقائه الى علاقات مادية بحتة ,, تحمل المادية في كل جوانبها ,,, و تصبح الجوانب الانسانية في وجهة نظرهم مجرد "شكليات" فالمهم الجد و العمل و الاجتهاد
  في ناس من كتر ما المادية طغت عليهم ,, تلاقيه بقى بينظر الحاجات المعنوية ,, عشان يقدر يفهمها , فتلاقيه حول حاجات محسوسة بحتة الى علاقات و نظريات و ارقام !!! حول الحاجات الي المفروض الواحد يحسها بقلبه عشان تاثر فيه ,, الى حاجات الانسان يتقبلها بعقله و يقعد يحللها و يفكر فيها !!
  اتمنى اني موصلش لليوم الي اتحول فيه لالة بتشتغل لاي سبب ,,,اله فقدت انسانيتها و تحولت الى مجرد مادة ,,
  اصدقائي الاعزاء ,, راجعوا انفسكم , فكثير مننا فقد انسانيته و تحول الى مجرد "آله" تفتقر الى ما يسمى بال"روح" :) 

• احيانا كتيير الواحد بيتمنى انه يبعد عن كل العالم المحيط بيه
  نفسي قوي اروح عالم جديد , , معرفش فيه اي حد ,, محدش واخد عني انطباع كويس ,, او حتى وحش ,, وانا مش مكون اي انطباعات عن حد ,,, ابدا من جديد ,, علاقات جديد ,,, ناس جديدة ,, تجارب جديدة ,, خبرات جديدة ,,, احساس انك انسان مختلف !! حياة الواحد في مجتمعه الحالي تحولت لروتين ! الناس هي هي و بتعاملك بنفس الاسلوب و مش متقبلة منك اي تجديد و لما تحاول تعمل اي حاجة جديدة تلاقي كل الناس فاهماك غلط ,, تحاول تلفت نظر الناس المقربين ليك لان في حاجات تانية ممكن تتعمل ,, بس مفيش فايدة !!
  
• مؤخرا ,, بقيت بحب قوي التواجد لوحدي ,, بقيت كتيير بخرج لوحدي ! ,,, اعمل الي انا عايزه لوحدي ! ,, بقيت بلاقي نفسي و انا قاعد لوحدي ,, و مش بلاقيها مع صحابي ,, اهلي ,, زملائي ,, حتى  في شغلي !
  اول مرة احب احساس الوحده كده ,, وادايق لما حد يخرجني منه !
  اول مرة ابقى مستمتع جداا وانا لوحدي ,, بعمل الي انا عايزه ,, و بستفيد منه ,, و بتبسط بيه ,,
  مش عارف الحالة دي ايه سببها ,,, او ممكن اكون عارف بس بستهبل :D ,, و مش عارف هتستمر لغاية امتى ,, ومش عارف انا عايزها تخلص ولا لأ اصلا !! هي حالة بمر بيها دلوقتي و مستمتع بيها ,, و شكرا :)
  
• مشكلة الناس انها لما بتتعود من شخص معين على حاجة ميبقاش عندها استعداد تتقبل منه اي حاجة تانية غير الي هي متعودة منه عليها !!
  الشخص الي الناس متعودة منه عالضحكة ,, محدش بيحبه مكتئب ,,, يا تضحكنا يا تطلع بره ؟!!!!
  الشخص الي الناس متعودة انها تروحله تطلب منه النصيحة ,,, مش مستعده تروحله تلاقيه مقدملهاش حل !! امال انا جايلك ليه ؟!!
  الشخص الي الناس متعودة منه انه بيدي على طول ,,, مبتتقبلوش و هو محتاج اي حاجة ؟!!
  ساعات ده بيعمل مشاكل لبعض من الناس دي ,, و في ناس بتتاقلم عليه و بتتعايش معاه و بتشيل جوه نفسها ,,, بس عامة تاكد ,, ان اي كان الشخص الي قدامك ,, فهو ليه وجه تاني ,, انت متعرفوش ,, هو بيخاف يظهره ,, بس هو في النهاية بشر,,, بيحتاج نفس احتياجاتك بالظبط ,, بيحتاج يحكي !! بيحتاج حد يضحكه !! بيحتاج حد ياخج منه النصيحه !! ,, بيحتاج كل حاجة انت بتحتاجها ,, بس هو اتحط في دور معين ,, اوقات كتيرة جدا مبيقدرش يظهر ده :)
  
• احساس مخزي شوية لما تكتشف انك بعد عمر طويل و لسه مش لاقي شخص فاهمك !! ساعات بتحس ان العيب منك !! و ساعات بتقعد تلقي باللوم عالناس ,, ايا كان ,, انت بتفضل عايش على امل انك تلاقي الشخص ده في يوم من الايام :)
  
  
• كــــفاية كــــــده ^_^