عن صديق

عن صديق الطفولة الوحيد 

عن اول صديق ليا

عن حسن محمد عبد الظاهر 

صديق الطفولة 

صاحب ليا من ثانية ابتدائي و حتى 5 ابتدائي 

اول شخص يعلمني حاجات كتير 

طول عمري كنت بتمنى يكون ليا اخ او اخت اكبر مني 

حسن كان هو الاخ ده 

كان هو و اخواته و ابوه و امه بمثابة عيلة تانية ليا 

ياما كنا بنقضي في بيتهم وقت كتيير ,, نلعب و نذاكر و نهزر ونكلم 

و ياما هما كانوا بيجيولنا نلعب و نذاكر و نتبسط 

حسن و عبد الرحمن و خالد وامل ,, دول كانوا اخواتي الثانين 

عن اشخاص انت ارتبط بيهم و انت طفل ,,,, تعلقت بيهم قوي ,, و فجاة بعدت عنهم 

حسن كان اكبر مني ب3 سنين ,, وده كان بيخليني اتعلم منه حاجات كتيير 

حسن اول صديق ليا يكافئني عن حفظي للقران و انا في 5 ابتدائي ,, لما ختمت القران خدني و عرفني على الانترنت ,,, الكلام ده سنة 2002 تقريبا ,,,  عرفت يعني ايه انترنت ,, و عملت ايميل ,, مكنتش عارف انا بعمله ليه ساعتها ,, بس طالما دخلت عالنت يبقى لازم يكون عندك ايميل ,, و لسه فاكر فرحتي ساعتها كانت عاملة ازاي 

وقالي عالمواقع الي ممكن ادخلها و استفيد منها اهم الي فاكره الياهو عشان الايميل واسلام اونلاين 

ساعتها كان الواحد لسه يحمل براءة الاطفال ,,,, فرحتك باكتشاف حاجة جديدة في عالمك دي شيء لا يوصف ,, و فرحتي بحسن انه خلاني اكتشف الاكتشاف دي كانت لا تقدر بثمن 

حسن اكتر صديق انا حبيته في حياتي بلا منازع ,, اخويا الكبير الي حبيته و اتعلمت منه حاجات كتير 

وانا في 5 ابتدائي سافرت ,, رجعت مصر 

و انقطعت اخبار حسن من ساعتها 

فاكر انه قالي انه ساكن في مصر شارع عرابي 

و فاكر اول مرة نزلت مصر كان عمري لسه صغير نسبيا ,,و قعدت اسال على شارع عرابي ده وموصلتش لحاجة :D 

و لما كبرت و اكتشفت القاهرة فيها كام شارع عرابي :D :D 

حسن فعلا صديقي الي معتقدش اني هقدر انساه ,, حتى لو متقابلناش بقالنا اكتر من 12 سنة 

بس اسئلة كثيير  بتقعد تلف في دماغ الواحد 

يا ترى هل حسن اصلا لسه فاكرني ولا لأ
اكيد معادش حسن صديقي بتاع الطفولة ,,, اكيد كبر دلوقتي ,,  وممكن يكون متجوز و عنده عيال كمان !!

هل يا ترى لسه محافظ عالنقاء و الطيبة الي كانوا فيه و احنا في 5 ابتدائي ؟ 

ولا الزمان غيره !!! 

يا ترة حسن دخل ضمن الصراعات السياسية دي ولا لأ 

يا ترى بقى شغال فين دلوقتي 

يا ترى هل لو اتقابلنا هنتقابل كاصحاب و هيبقى بينا حرارة القاء بعد غياب اكتر من 11 سنة ؟!

ولا هنتقابل كما الغرباء ,!! 

ياترى ,,, يا ترى ,,, يا ترى ,,, 

كنت دايما بقول ان نشاتي خارج مصر حرمتني من حاجة موجودة عند كتير مننا اسمها اصدقاء الطفولة ,,, انا اصدقائي في ابتدائي كانوا من كل الدول العربية  ليبيا و الجزائر وتونس و العراق و فلسطين و سوريا و لبنان و غيرهم 

اصحابي ايام الطفولة ,, الي للاسف مش فاكر حتى جزء كبير منهم ,, فاكر بعض اسماء
انور من ليبيا 

و ايمن ,, مش فاكر منين :D 

بس الي فاكرهم كلهم هما حسن و اخواته :) 

كل مرحلة في حياتي كانت بتحمل اصدقاء مختلفين ,,, بمرور العمر و ان كل واحد بيروح في ناحية بتقل علاقة الصداقة تتحول لصحوبية ,, نتقابل كل فين و فين ,, بس لازلنا نكن كل الحب و الاحترام و التقدير لبعض 

اخشى ما اخشاه ان يتحول اصدقاء الجامعه بمرور الزمن او بمجرد انتهاء المرحلة الجامعية الى اصحاب 

كل يشق طريقه ,, وربنا يبارك للجميع 

عارفين ,, انا لو عايز اوصل لحسن هوصله ,, الموضوع هيكون متعب شوية لان والده صديق والدي بس هو خارج مصر ,, فهضطر اخلي بابا يكلمه يجيب منه رقم ابنه 

بس الحقيقة انا خايف 

بفضل احتفظ بالصورة الجميلة الي في ذهني دي لشخص غير موجود ,,, احسن ما اكلمه و يطلع مش فاكرني!!! ,, معلش 12 سنة كتير برده ,,, و الواحد بيطرا عليه فيهم تغيرت اكتر 

في النهاية التدوينة دي كنوع من العرفان بالجميل لصديق قديم ,,, او صديق الطفولة الوحيد :) 

لعل القدر يجمعنا مرة ثانية ,,, 

ويطلع لسه فاكرني ,:)