ام عبد الله مرة اخرى

اعضاء و قراء المدونة الكرام
فاكرين ام عبدالله الي كنت اتكلمت عنها في تاني تدوينة ليا
النهارده دار بينا حوار غريييب

ام عبدالله بتقولي والله يا بلال يبني انا بدعيلك من كل قلبي اني اشوفك زي فريد الديب كده !!!
فقلتلها مين ؟!!
قالتلي فريد الديب محامي مبارك و اعوان مبارك ,, بدعيلك انت و كل الي في الجمعية تبقوا زي كده و بدعيهالكو قبل الفجر والله عشان ربنا يستجيب (هاار اسود )

الصدمة كانت قوية عليا افتكرت زعلناها في حاجة قلتلها ليه كده بس ؟!
قالتلي ليه كده اشوفك استاذ دكتور محامي قد الدنيا زي فريد الديب كده واسمع عنك في الراديو و تبقوا حاجة محترمة و حاجة كبيييرة و افرح بيكو كلكو و ,,......
هو انا اتصدمت و حسيت بحالة من البلاهة ,, مش عارف اقولها ايه
خايف اصدمها بعد العمر ده كله ان فريد الديب وحش
ومش عايز احرجها ان الدعوة دي مش حلوة خااالص :D
ففضلت ساكت و هي قعدت تدعي و توضح ليه هي بتدعيلنا وكده وانا ساكت
وانا ماشي بتقولي هو انت ليه قلتلي ليه كده لما دعيتلك زي فريد الديب ,,, قلتلها اصلي مبحبوش :D

اتصدمت شوية وقعدت تقولي هو لو وحش يبقى منحبوش و احنا منحبش حد بيعمل حاجة غلط و ....
وانا مشيت مندهش اندهاش اول مرة اندهشه في حياتي

ام عبدالله واححنا في ايام امتحانات  وايام مفترجة بتدعيلي تشوفني زي فريد الديب و مبارك و اعوان مباااارك !!!
:D :D
الصدمة قوي الحقيقة انا مش عارف اعبر عنها
بس زعلت ان بالنسبالها دول احسن ناس في الدنيا
انا مقدر ان ي نفسها تشوفنا حاجة حلوة ,, بس حزين ان بالنسبالها دول الحاجة الحلوة ,, دول الشخصيات الجميلة

لو انتو مكاني في الموقف ده هتعملو ايه :D :D