عن ام عبدالله .... احدثكم :)

السلام عليكم 
اولا شكرا جزيلا للناس الي شجعتني و عمتني في اول تدوينة ليا ربنا يباركلكم .... نردهالكم في الافراح ان شاء الله :D

المرة دي بقى انا جاي اكلمكم عن حاجة مهمة قوي في حياتي ...و جايز محدش يعرف عنها حاجة ...وهي ام عبدالله 

مين ام عبدالله ؟؟...... سؤال وجيه :D

ام عبدالله دي وحدة من الناس الي بننزل نوزعلهم اكل في برنامج الاطعام التابع لجمعية رسالة 

ام عبدالله دي ست كبيرة ... فوق ال60 سنة ويمكن اكتر من كده كمان 
ام عبدالله انسانة كفيفة او ضريرة من 7 سنين 
ام عبدالله عندها شلل اطفال 
ام عبدالله عندها السكر 
ام عبدالله ولادها كلهم ماتو من اكتر من 7 سنين 
ام عبدالله مالهاش اي حد تاني في الدنيا دي غير ربنا .. اللي مسخرلها شباب جمعية رسالة بيساعدوها في كل حاج في حياتها ربنا يباركلهم .... لما بتعوز اي حاجة مبيتاخروش عنها 

المهم  ام عبدالله دي بقى  يعني مش عارف اقول هي بتاثر فيا قد ايه كل ما اشوفها 
عارفين الرضا الاسطوري الخيالي اللي نسمع عنه في حكاوي كده بس مبنشوفوش ... انا بشوفه 
الست دي رااااااضية جداااااااا .. رضا انا مشوفتش على حد في حياتي ولا اظن اني هشوفه في حياتي تاني اصلا 
ام عبدالله بتتكسف او مبتحب تقول لحد انها مبتشوفش .... عارفين ليه ... بتحس ان ده سخط منها على ربنا و هي شايفة ان ده نعمة من ربنا عليها
ومبنحبش تشتكي لحد على حالها ... خايفة ليكون ده كده عدم رضى و هي بتقولي دايما انها راضية بنعمة ربنا عليها
دايما تقول ان لو ربنا خد منها كل حاجة في حياتها فكتر خيره انه سابلها عقلها .. عشان الانسان من غير عقله ميعرفش يعمل حاجة في دنيته
دايما و هي قاعدة لوحدها تسلي وقتها بذكر ربنا .. سواء استغفار او تسبيح ...ناس واصلة ... بس مع ربنا :) 
الست دي ايام رمضان كنا نروح نوديلها الاكل ..نلاقيها تعبانة قوي و شبه داخلة في غيبوبة سكر ...ونقولها ان افطري يعني انتي تعبانة وربنا حللك انك تصومي مش هتاخدي ذنب
ترد علينا و تقولنا .. انها مصممة ..انها عمرها ما هتفطر يوم في حياتها في رمضان ...مع ان الدكتور بيقولها لاااااازم تفطر ... بس هي شايفه نفسها قادرة تصورم ..بتتعب شوية بس مش مهم كله بثوابه 
عارفين ليه هي مش عايزة تفطر اي يوم في حياتها 
نص كلامها "هو في احسن من اني اقابل ربنا وانا صايمة " !!!
ام عبدالله بتحاول دايما تصوم اتنين و خميس ... 
قالتلي انها علمت شباب كتير من شباب الجمعية انهم يصومو اتنين و خميس ...و علمت ناس تانيين انهم ينتظمو في الصلوات في المسجد :)
(حد لسه عنده اي عذر انه ميدلش الناس على طريق ربنا ؟)

الست دي قاعدة لواحدها دايما .....بتفرح قوي لما حد بيروحلها و بتقعد تحكي معاه ...وهي زي العسل في حكيها اصلا ^__^ 
اكتر ناس بتحبهم في الجمعية هما شباب الزيارات ... لانهم كانو بيروحولها على طول يقعدو معاها و كان في ناس منهم اللي بيجيب والدته او عمته او خالته و يجي يقعد معاها 
كان في بنات بيروحو ينضفولها البيت (اوضة و صالة ) و يخلوهالها زي الفل 
والاهم من كل دول .. شباب الزيارات دول كانو بيروحولها مش عشان حاجة غير عشان تحكي معاهم ... بس مش اكتر
وهي دي اكتر حاجة بتفرحهم ..و بتفرحها .. بتبقى مبسوطة قوي بلمة الشباب دول حواليها .. بتحس ان ربنا عوض عليها بالشباب دول 

ام عبدالله بتحب الكباب ...بتقولي انا ست صاحبة مزاج اه يعني بحب الكباب و كنت باكله زماان ايام ما كنت بعافيتي ^_^ 

ام عبدالله الحمد لله الحمد لله بتحبني ...قالتلي اخر مرة روحتلها انها حلمت بيا في المنام ... مع انها مشافتنيش قبل كده بس قالتلي انها كانت متخيلاني كويس قوي في الحلم و حلمت اني روحتلها  وقعدت معاها شوية وطلبت مني احققلها الحلم ده لان هي من يوم ما ربنا خد منها نظرها و هي كل الاحلام الي بتشوفها بتتحقق فقعدت معاها شوية يومها .... بس كنت فرحان قوي قوي اني جيتلها في الحلم
يعني الناس البركة دول لو الواحد مفرحش انهم بيحبوه  وشافوه في الحلم هيفرح بمين 

بكل صدق وبكل امانة ... ام عبدالله الحاجة الوحيدة الي مخلياني مكمل مع جمعية رسالة ... ساعات كده بحس اني مقدرش اعيش من غير ما اروحلها اخد منها جرعة الايمان و الدعوات الاسبوعية .... بتقعد تدعيلنا كتيييييييييير قوي ..ده قدامنا و بتقول انها طول ما هي قاعدة لوحدها بتدعيلنا وانا متاكد ..ان ربنا حايش عني بدعواتها دي بلااااااااااااااوي كتييييييير لا يعلمها الا هو 

ام عبدالله تجربة فريدة  في حياتي ... معرفش كان ممكن شكل حياتي يبقى ايه من غيرها ... بس الاكيد الاكيد ان عم عبدالله علمتني حاجات كتيرة جدااااا اهمها ... المعنى الحقيقي للر ضى
اي حد عنده اي ابتلاء في حياته يقارن نفسه بام عبدالله ...ويشوف هل الابتلاء ده مقارنة بام عبدالله يستحق انه يسخط على ربنا ولا لأ

طلب صغير لكل واحد هيقرا دي ... لو اي حد  فيككو حس في وقت انه فاضي ...ويحب يروح يزور الست دي يا ريت ميتاخرش ...محدش عارف يمكن تدعيلك دعوة حلوة ربنا يكرمك بيها ....ممكن تشفعلنا و تدخلنا الجنة معاها .. اننا دخلنا السرور عليها . ربنا يتقبل مننا يااارب

دي قصة ام عبدالله ... انا سبتهالكم تطلعو انتو منها العبر و الدروس الي انتو عايزينها ..لاني لو قعدت اقول الدروس الي بنتعلمها منها عمري ما هخلص :)


في النهاية سؤال بسيط :) ...
 الجنة لو مكانتش لناس زي دي ... هتكون لمين ؟؟