السلام عليكم ورحمة الله و بركاته
اصدقائي الاعزاء تحية طيبة و ياارب تكونو مبسوطين و الدنيا ماشية تمام معاكم في الامتحانات و المذاكرة ^_^
الموضوع ده بعرض وجهة نظري في حاجة ,, لكم الحق في قبولها او رفضها و مبجزمش انها صح
ندخل في الموضوع
انا شايف ان الاصل (وخلي بالك كويس من كلمة الاصل دي ) في كل مشاكلنا ... امراض نفسية
ايووون
يعني احنا كلنا كده بالصلاة عالنبي مرضى نفسيين ,,, الا من رحم ربي
واخدين بالكم من حرف ال "ن" ل تقولو بلال جاي يهزقنا ولا بتاع انا بتكلم عن نفسي قبل ما اتكلم عن اي حد تاني :D
وقبل ما تتعصب و تتدايق و تقول بلال بيخرف و بتاع خليني اسالك الاول يعني ايه مرض نفسي بالنسبالك ؟!
فكر شوية قبل ما تكمل المقالة
الامراض النفسية انواعها كتييييير جداااااا ,, بعضها حاجات مرضية مرضية يعني و تستلزم وجود المريض بيها في لامؤاخذة العباسية :D ,,,,دول بقى الحمد لله مش االي انا بتكلم عنهم ^_^ ربنا يحفظنا و يحمينا جميعا
في بقى انواع تانية من الامراض النفسية ,, هي السبب في اغلب مشاكلنا
يعني عندك مثلا ,, القلق ده ,, مرض نفسي
التوتر مرض نفسي
عدم الثقة بالناس مرض نفسي
وسوء الظن بالناس برده مرض نفسي
عدم الثقة بنفسك مرض نفسي
نظرية الاضطهاد و ان في شخص عايش دور الضحية على طول و شايف كل الناس مضدهدينه ,,, مرض نفسي
نظرية المؤامرة و ان دايما في مؤااااامرة كبييييييييرة بتتدبر ضدي او ضدنا ... مرض نفسي
والخ الخ ,, حاجات لا يتسع المجال لذكرها بس الابحاث في كده كتيييرة لو حبيت تقراه و تستفيد وهتقدر تطلع لوحدك الامراض الي انا اقصدها انها بتسبب المشاكل عندنا
خليني امسك مثال صغير خالص كده اوضح بيه كلامي
مشكلة بتتكرر كتييييير لو مكانتش كل يوم ,, ياما احنا بنفهم الناس غلط او حد يفهمنا غلط وينتج عن ده مشكلة كبييرة
سوء تفاهم يعني ,, و بنسلم بده و نقول ان مشاكلنا سببها سوء تفاهم
دور كده فيما ورااء سوء التفاهم
هتكلم عليا مثلا
انا دلوقتي لو واحد قالي حاجة ,, فسرتها بطريقة انا عايز افسرها بيها ,,, حط تحت اخر جملة دي 5000 خط ,,,
يعني مثلا انا واخد انطباع مسبق عن شخص انه مبيحبنيش ,,, جه مثلا قالي على فكرة انت مش فاهم الموضوع ده كويس
جملة بسيطة و عادية اهي
يا نهااار ابيض بقى عالي هيحصل
بص بيقول عليا مش فاهم
بص عامل نفسه فاهم اكتر مني
بص هيعملي فيها بتاع ,,, و الخ الخ
انا متاكد ان موقف ده او شبيه بيه مرينا بيه اكتر من مرة وقد ميكونش رد الفعل عنيف كده ,,ممكن حتى يبقى حوار داخلي ,, ممكن يبقى انطباع ,,ممكن افسر جملته دي انه بيتمنظر عليا ,,,كل ده ناتج لييه ,, عشان انا شايفه مبيحبنيش طب ليه شايفه مبيحنبيش .. اصل انا فسرت مواقف تانية ليه قديمة بنفس التصرف او موقف واحد حتى هو الي عمل الشرارة دي
وفي النهاية كل ده نابع عن عدم ثقتي بنفسي و عدم ثقتي في الشخص الي قدامي انه انا معملتلوش حاجة تخليه يتعامل معايا كده
ده مثال صغير ممكن يوضح كلامي و ممكن ميوضحوش بس دورو جوا حياتكم هتلااااقو العديييد من المشاااكل الي حصلت بينا و بين اي حد
بصو عالواقع السياسي المصري ,,, هتلاقوا كمية امراااض نفسية رهيييييييية ,,, حللو الموضوع ده شوية هتتعلمو كتيير
طيب الموضوع ده يتعاالج ازاي ,, انا مش جاي اقول اننا مرضى نفسيين و امشي
حل الموضوع ده يتلخص في نقطتين
اول نقطة قاعدة ذهبية قريتها في كتاب العادات السبع للناس الاكثر فاعلية لستيفن كوفي
القاعدة بتقول "اسع من اجل الفهم اولا ثم اسع من اجل ان تفهم " بضم التاء
يعني ايه الكلام ده ,,, يعني لو داخل حوار او مناقشة خلي كل هدفك الرئيسي فيها اول حااااجة انك فعلاااا داااخل بتحاول تفهم
مش دااخل بتحاول تفرض وجهة نظرك
افتكر مقولة الامام الشافعي
راي صواب يحتمل الخطا وراي غيري خطا يحتمل الصواب
ادي لنفسك فرصة الاول انك تسمع و تتفكر شوية في الكلام جايز ييطلع منطقي و فعلا تطلع وجهة النظر التانية صحيحة
نيجي بقى للنقطة الثانية
سؤال
انت ايه الي بيحركك في حياتك
الحب ولا الخوف ؟؟
شرح النقطة دي يطووول و يطووول و يطووول هحاول اشرحها دلوقتي بسرعه
بس خليني ابسطها بمثال
يعني مثلا ,, انت بتذاكر ليه ؟؟ عشان تنجح ؟! عشان خايف تسقط ؟! عشان وجاهة اجتماعية ؟! عشان الاقي شغلانة ؟! و غيره من الاسباب الي زي دي ,,, كل دي اجوبة شخص بيحركه في حياته الخوف
طب لو شخص بيحركه الحب هيذاكر ليه ,, هيذاكر لتقديره للمادة العلمية الي بيدرسها و احترامه للمدرس الي بيديله و لانه عنده فكرة و حلم نفسه يحققهم و المذاكرة وسيلة هتساعده لتحقيق الحلم ده و يقدر بيها يخدم بلده و ناسه و يساعدهم ... ليه كل ده ,, لانه بيحبهم :)
عشان متتصدمش ,, لو الخوف الي بيحركك فده مش حاجة وحشة قوي يعني ,, او هو حاجة وحشة شوية صغيرين يعني
بس مش هياثر معاك في النتيجة
يعني انت سواء كان بيحركك الخوف او الحب في كلتا الحالتين وارد جداااااا انك تنجح و تجيب تقدير و تقدير عالي كمان
اضيف لمعلوماتك ان 90% من عظماء القادة في التاريخ كانو بيحركهم الخوف ’’’ لاحظ انهم بقم قادة
الله؟! امال ايه الفرق بقى يا عم الامور :D
الفرق في الرحلة نفسها ,,,
لما يكون الحب الي بيحركك السعادة هي السمة الاساسية لرحلتك ,,مش بس السعادة ,, لأ الفرحة كمان
انت شخص حاسس بالامن و الامان العام في حياتك مطمن للناس الي حواليك و حتى لو حد دايقك فيهم فانت ده مبياثرش فيك لان اصلك طيب انت شخص قضيت على كل الامراض النفسية و مشتقاتها الي ممكن في يوم من الايام تتواجد فيك
اما لو انت شخص بيحركه الخوف فانت مضطرب ,, السعادة بالنسبالك لحظات مش اسلوب حياة يوم ما بتنجح,, بتفرح
طريقك لغاية ما نجحت انت متكدر فيه تكديرة سودة و مش طايق نفسك و ايه الغلب ده و حاجة تزهق والخ الخ
مش هتبقى مطمن للناس الي حواليك ,, مفيش امان لحياتك ,, يعني على طول خايف من الناس ,, هتكون وفرت لكل الامراض النفسية بيئة خصبة قوية جداااا تنمو فيها الى ان يشاء الله
هيتريقو عليا ,, هيقولو عليا ايه ,,, ده فلان نفسه اسقط ,, ده فلان نفسه يجيب مجموع اعلى مني ,,, ده فلان هيفرح فيا لو جبت مجموع وحش فانا لازم اذاكر عشان اغيظه ,, و غيره من الحاجات الواضحة هتقدور تتطلعو حاجات كتيرة
يعني مثلا في اول مثال خلينا نفترض ان الشخص التاني انت طبقت اول نصيحة و سمعته الاول و انصت ليه و اكتشفت ان وجهة نظره صحيحة
تيجي بقى النقطة التانية ,, هتعترفله ولا هتعند ؟؟
الي بيحركه الخوف هيعند و هيكابر و هيدافع عن وجهة نظره باستماااااتة ليه ,, اصله خايف الناس تقول عليه بيرجع في كلامه ,, اصله خايف من شكله هيطلع وحش انه مش فاهم الموضوع ,, اصل اصل
الي بيحركه الحب هيفرح ان الشخص التاني طلع صح ,, اه و الله
الامام الشافعي بيقول ما جادلت احدا الا تمنيت ان يجري الله الحق على لسانه
شوفو الحب لدرجة ايه
في نقطة مهمة جدااا كمان عايز اضيفها
متديش لنفسك الفرصة للحكم على نوايا اي شخص من تصرفه مهما كان تصرفه
ربنا بيقول في كتابه لسيدنا محمد "فانما عليك البلاغ و علينا الحساب"
ربنا مداش للنبي حق انه يحاسب حد ,, ربنا بيقول لسيدنا محمد انت تبلغ و بس و عبادي هيجولي انا هحاسبهم
فباي حق نصبنا انفسنا الهة على بعضنا فاصبح كل منا يحاسب الاخر و يفترض له نواياه و يفسر تصرفاته على هوواه
لو في تصرف مش فاهمه او حاسس انه ممكن يتفهم غلط مفيش اي مانع انك تسال صاحبه تقوله هو انت تقصد ايه بالظبط من التصرف ده ,, والاحسن انك تفترض حسن النية و خلاص ,, حتى لو انت مش عارفها :)
اتمنى الموضوع يكون عجبكم و استفدتم بيه و الاستفادة الحقيقة اننا كلنا نحاول نطبقه في حياتنا و تعاملاتنا عشان نقدر نعيش حياة احلى ان شاا ء الله :)
وفي النهاية الموضوع مطروح لنقدكم و ارائكم
وفي ملحوظة مهمة جداااا حابب اكد عليها
الكلا ده موجه ليا قبل ما يكون موجه لاي حد تاااني
يعني انا اول واحد نفسه يطبق الموضوع ده و نفسه يتخلص من كمية الامراض النفسية الي عنده بس ادينا بنحاول و الله المستعان
وانا مش بهزق ولا بشتم حد والله ان بعرض مشكلة عشان نحلها مع بعض و نوصل لمجتمع احسن ان شاااء الله :)
وشاااكر جدااا لاهتمامك و قرائتك للمقالة دي ^_^
