في ناس كده ,,, اهم حاجة عندها في الحياه ,, نفسهم
يعني انا
يعني بياخد كل حاجة في حياته يحولها لحاجة شخصية
يسقط اي حاجة بتحصل في الحياة عليه
تحكيله عن موقف معين ,, يقولك اه انا لما اتعرضت في الموقف ده عملت كذا و كذا وتلاقي الحوار فجاة اتحول لرواية عن انتصاراته الشخصية ؟!!
يحصل موقف ممكن يعدي ,,, تلاقيه زعل منك و ازاااي انت تعمل معايا انا كده !!
و انت المفروض تعمل معايا كذا و كذا
تطلب منه اي حاجة ,, معندوش استعداد يضحي باي جزء من متوعه الشخصية في سبيل انه يفيدك و يساعدك
لو هو فاضي و مش وراه اي حاجة خااالص ولا حتى مثلا النوم !! يقولك ماشي ,, و يكون متضرر كمان ,, و ممكن جدا يسالك عن مقابل !! اي مقابل
مساعده الناس حاجة تاتي درجة رابعه في حياته او خامسه او عاشرة ,, مش اولوية يعني
اهم حاجة مساعده نفسه ,, ثم خدمة نفسه ,, ثم ارضاء نفسه ,, ثم اسعاد نفسه ,, ثم تحقيق رغبات نفسه ,, و بعدين بقى يعمل اي حاجة ثانية
طيب بصوا
الموضوع مش بالسوء ده
دي اقصى درجة منه
في درجات اقل ,, بس خلاصة الكلام ,,, رقم واحد عنده نفسه يعني "مصلحتي اولا " و الباقي ؟!! كل واحد مسئول عن نفسه
الناس دي مشكلتها انك متقدرش تلوم عليها في اي حاجة ,, لان محدش يختلف ان انت مهم جدا تهتم بنفسك ,, و تراعيها
بس الاختلاف هنا ان للاخرين حق عليك برده
يعني لو واحد بيحكيلك موقف ,,, هو مش بيحكيه عشان يسمع تجربة حضرتك فيه ,,, هو بيحكيهولك عشان ياخد منك نصيحة ,,, او حتى بيحكيهولك لمجرد انه مخنوق و عايز يحكي ,, هو عايز يحكي مش عايز يسمع ,, تقبل منه حكيه ,,, دي في حد ذاتها مساعده !!
لو حد عمل معاك اي موقف ,, دور على اي مبرر يخليك متدايقش منه ,,, و بمجرد متلاقيه امسك فيه ,, ولو ملقيتوش (ده يبقى الشخص ده مش نافع يعني و كارهك كره العمى ) احتسبها عند ربنا و خد ثوابها ,,, خلي قلبك كبير يعني ,, بييستحمل اخطاء الناس بدون ما يشيل منهم ,, معلش ,, كل الناس عذورة و كل واحد فيه الي مكفيه ,,, فمتقفش لكل واحد عالواحده ,, و يا ريت لو وقفت عالواحده متفضلش فاكر الموقف ده و تكتم في نفسك ,,, انت الي هتتعب والله روح للشخص ده وقوله انت دايقتني في كذا و كذا ,, مش يمكن يعتذرلك و المشكلة تتحل ؟!
اخر حاجة ,, لو حد طلب منك حاجة ,,, مش لازم يكون اول رد فعلاي تلكيك عشان خاطر تعتذر ,,, في ناس بمجرد ما تقولها عايز منك خدمة ,, قبل ما يعرف انت عايز ايه يبتدي يجهز ايه العذر الي هيقولهولك ,,,
في ناس تطلب منها خدمة ,,, حتى لو ساعدك ,, تحسه مش متحمس ,,, بيعمل الي بيعمله غصبن عنه
ومكن يقولك عذر ,, هو قد يكون بالنسبالك مش منطقي ,,, بس متقدرش تقوله حاجة ,,, بتستنج انه مش عايز يساعدك , و خلاص شكرا كده
اول حاجة للشخص ده,,, انت بتخسر كتير بعدم مساعدتك لغيرك ,,, مش هقعد اقولك بقى الكلام بتاع ما استحق الحياة من عاش لنفسه فقط والكلام ده
بص ,, جرب تساعد غيرك ,,, بتسيب اثر كويس قوي عنده ,, صورتك انت بتتحسن ,, دي حاجة حلوة في حقك يعني ,,, محدش هيقدر يقول عليك اناني و بتهتم بنفسك بس
كمان ممكن تساعد الناس عشان خاطر هما يتبسطوا ,, فبالتالي انت طبيعي هتكون مبسوط عشان خاطر ربنا جعلك سبب انك خليت واحد مبسوط
كمان ممكن تساعد الناس عشان تسيب حاجة في الحياة ,, تسيب اثر ليك ,, صدقة جارية ,, او اديت معلومة و في ناس بتستفيد بيها ,, او دعوة حلوة تمنع عنك بلاء ربنا كان منزله ,,, مساعده الناس بتعود اكثر ما بتعود بالنفع عليك انت
مش هيجرى حاجة لو ضحيت شوية من سعادتك و شهوتك الشخصية في سبيل انك تساعد حد تاني
يعني مثلا لو قاعد عافيس ساعتين في اليوم وحد طلب منك حاجة مش هيجرى حاجة لو خليتهم ساعه و نص
لو بتنام 8 ساعات مش هيجرى حاجة لو خليتهم 7ونص
مش لازم ادلع نفسي عالاخر كده و اديها حقها ثالث و مثلث
تبقى مدللة ,, الي هي عايزاه بيتنفلها ,, و النفس مش عايزة تتعب ,, او لما تتعب تتعب عشان خاطرها هي برده ,,, حاول تربي نفسك شوية :)
قصة اخيرة هختم بيها كلامي ,, عن 3 من التابعين ,, واحد فيهم كان محتاج فلوس جدااا فبعت لصديقه ده يقوله لو سمحت انا معييش فلوس اصلب بيها عودي و اكل بيها ولادي ,, فصديقه ده كان عنده مجموعه من المال ,, راح باعتهاله كلها و قام باعت لصديقهم الثالث ,,, قاله لو سمحت انا معييش فلوس اصلب بيها عودي و اكل بيها ولادي و محتاج فلوس ,,, فصديقهم الثالث كان معاه مجموعه من الفلوس راح باعتهاله كلها
و بعت للاول ثاني يقوله انا محتاج فلوس اصلب بيها عودي و اكل بيها ولادي ,,, راح باعتله الفلوس الي جاتله من صديقهم الثاني مع انه طلبها عشان محتاجها ,, بس لما صديقه او اخوه محتاجها مقدرش يتاخر عنه
ده نموذج لدرجة عالية قوي من التضحية في مساعده الغير ,, مبطلبش نوصل ليها لانه كتيير هيقولو مستحيل ,,, بطلب بس نحاول نقلدهم على قد ما نقدر :)
الكلام ده انا زي ما قلت موجود بنسب ,, , و اقدر اقول موجود عندنا كلنا ,,, بس بنسب ,, بتتفاوت من اقل الى اكبر نسبة
وبحلم بمجتمع الناس كلها عندها استعداد تساعد بعض بدون اي مقابل ,, كلنا بنحب قوي نخدم بعض
نفرح لو حد طلب منك حاجة
بتسامح لو حد قالك حاجة معجبتكش و ,,, و بتبتلمس العذر
ربنا يهدينا جميعا و يرحمنا برحمته :)
