عن مجتمعنا الموقر 4- الشتايم

كلاكيت معرفش للمرة الكام 
انما الامم الاخلاق ما بقيت ,, فان هم ذهبت اخلاقهم ذهبوا 

اكلمت عنها اكتر من مرة ,, و برجعلها تاني في موضوع يمس صلب الاخلاق 
الشتــــــــــــــــــــايم 

ظاهرة متخفاش على اي حد دلوقتي ,,, 
بقيت بتشوفها في اي مكان ,, و اي زمان ,,, 
انا ممكن احلف ان مفيش حد في مصر كلها مسمعش شتايم ,,,, و 80% من الي في مصر بيشتموا (بحاول اكون متفائل ) 

الاطفال حتى بقوا بيشتموا ,, و الموضوع مبقاش مدهش !! 
يعني بقى طبيعي جدااا تمشي في الشارع تلاقي طفل في ابتدائي بيشتم صديقه باقذر الالفاظ ,,, بيهزر معاه !!!! 
و بقيت انت الي غريب لانك مستغرب حاجة زي دي !! عادي يعني !! 
بقى طبيعي انك تبقى قاعد مع صحابك و تلاقي الشتايم شغالة عادي ,, بتتقال في النص زي ما بتتقال اي كلمة  و بتعدي عادي !!
وفي ظاهرة اغرب ,, ان في ناس تقولك ايه ,, لا اصلي قدام بنات مش هشتم ؟!! 
مؤدب قوي انت كده 
جنتل خالص يعني ؟! 
الواد المحترم المتربي ؟!! 

و في ظاهرة اعجب و اعجب ,,, انك تلاقي في بنات   بيشتموا ,, و برده بقى عادي ,,,
حتى لو نسبتهم قليلة مقارنة بالولاد
البنات الي هما المفروض مثال للعفة و الطهارة ,, بيشتموا بعض بشتائم في ولاد كتير بتتكسف تقولها و الله !!!

ازمة المجتمع في الظاهرة دي مش وجودها , عندنا ظواهر كتير انيل و مبتعملش ازمة 
انما مشكلتها في انها بقت "عادي"
يعني بقت سمة مميزة 
يعني مبقاش ينفع تقول لواحد بيشتم انت بتشتم ليه 
لأ ده الطبيعي هو المفروض الي يسالك انت مبتشتمش ليه ؟!

الواحد لولا انه مقتنع انه اتربى صح و ان دينه بيامره بعفة اللسان كان بقى بيشتم هو كمان !!! 
بالظبط كده ,, هما دول اهم عاملين عشان تقدر تحمي نفسك من الانزلاق في المستنقع ده  تربية صحيحة ,, مع انها مش كفاية,,, اعرف ناس كتير اهاليهم ربوهم احسن تربية ,, بس اتحطوا في الوسط الفاسد الي بيشتم ده فبقى عادي انه بيشتم ,,, لان مفيش وازع ديني يخليه يمنع نفسه من ده ,,, بابا و ماما قالولي على حاجة غلط ,, كبرت لقيت الناس كلها بتعملها ,,, يبقى اكيد بابا و ماما غلط !!

و هنا هتوجه بكلامي للناس الي بتشتم عادي ,, و يا رب يكونوا بيقروا الكلام ده 
هو انت مبيصعبش عليك والدك ووالدتك و انت مبهدلهم معاك و مع الي يسوى و الي ميسواش 
خليت كل من هب و دب يشتم الناس الي اوجدوك في الحياة و ربوك , باقذر الشتائم و الالفاظ ,,, هما هانوا عليك كده ؟!! 
عارف انك لو انت محترم و مبتشتمش مفيش حد هيقدر يفتح بقه معاك ,,,, حتى اكتر واحد بيشتم هيجي قدامك و هيبقى محترم 
مش هيقدر يجي جنبك عشانك انسان محترم ,, فهيعاملك باحترام 


كمان الشتايم بقت هزار 
يعني عايز تهزر مع صاحبك ممكن تبتدي الهزار بيلا يا بن ,,,,,, 
فهو هيرد عليك بالمثل 
و هتقعدوا تضحكوا و فرحانين و مبسوطين 
و هتستمروا كده شوية لغاية ما تزهقوا او الشتايم تخلص .؟؟!!!

 ابوس ايدكم كفاية تقعدوا  تشتموا  في الناس ,, صاحبك الي بتشتمه ده انسان محترم ,,, ربنا خلقنا و كرمنا عشان نحترم بعض ,, مش عشان نفضل قاعدين كل شوية نهين في بعض !! 
اهل صاحبك الي انت مبترحمش و كل ما صاحبك يدايقك تشتمهم ,, مالهمش ذنب ,, ناس طيبين و غلابة ,,, وكفاية قوي غيبة في خلق الله ,,, 
في مصطلح اسمه عفة اللسان ,,, دوروا عليه ,, وشوفوا نماذج لناس لسانها عفيف ,, هتحسوا بالفرق والله 

مش بس كده ,,, في ناس كتير سماع كلمات قبيحه زي دي بيديقها ,, الناس الي لسه فطرتها نقية و صافية ,,, متجرحش احساس الناس دي ,,, متخدشش حيائهم ! 
كفاية الي باظ من مجتمعنا ,, خلوا الناس النضيفة دي زي ما هي 
سيدنا محمد بيقول انما بعثت لاتمم مكارم الاخلاق ,,, بص لنفسك و شوف انت عندك قد ايه من الاخلاق ,,, هتعرف انت قد ايه بتطبق من سنة النبي و من رسالته 
تخيل لو النبي عايش معانا و شايفك و انت بتشتم صاحبك و ابوه و امه ,,, تفتكر هيكون مبسوط ؟!
والله هيحاسبنا على مكارم الاخلاق الي ضيعناها !!!

وانت يالي مبتشتمش ,, متقعدش في مكان فيه ناس بتشتم ,, عرفهم انهم غلط ,, حسسهم انهم منبوذين ,, حتى لو افتكروك بتتعالى عليهم ,, انأى بنفسك انك تسمع التلوث و السفالات الي بتتقال دي 
خلي لسانك مينطقش الا بخير ,, وودانك متسمعش الا خير ,,, 
لو لقيت حد بيشتم عرفه ان كده غلط و حاول تخليه يبطل 
ربنا يرحمنا جميعا برحمته الواسعه و يغفرلنا و يهدينا اجمعين :) 

عن مجتمعنا الموقر ... 3- الاغاني الشعبي

اصدقائي الاعزاء
عودة بعد فترة انقطاع :D :D
و اخيراا هنكتب تدوينة الاغاني الشعبي ,, مكانتش راضية تتكتب مش عارف ليه :D :D


الاغاني الشعبي
ظاهرة مميزة للشعب المصري حاليا
مش قادر اتخيل ان احنا في زمن ثقافته متمثلة بالاغاني الشعبي
يعني بص على مراحل مصر المختلفة كده ,,, من ايام زماااان
سيد درويش ,, و عبد الوهاب و بعدين ام كلثوم و عبد الحليم ,, و بعدين المغنيني الجداد باختلاف اسمائهم ,, و اخيرا
اصبح الممثل الرئيس لثقافة شعب مصر ,, اوكا و اروتيجا ,,, 8% ,,, فرقة الموت ,, مش عارف ايه ,, اسمائهم حتى عجيبة كده :D

نيجي بقى لكلماتهم الرائعه و الحقيقة هي دي اصعب ما في الموضوع :D
لان انت مبتقدرش تطلع كلمات :D
وهنا هنحتاج نعرف الاغاني الشعبي فنقول انها عبارة عنن مجموعه من التلوثات المختلفة ,, سمعي و بصري و حسي و نفسي و كل حاجة ,, تجمعت في اغنية
فبتلاقي الالكومسطبل الي بيعزف بيحط جميع انواع الاللات و الاصوات الي موجودة عنده في الجهاز
ثم يبتدي المطرب ذو الصوت البذيء (و دي صفة اساسية في الي بيغني شعبي ,,, مينفعش تكون صوتك حلو ) يقول مجموعه من الكلمات لي ماهاش اي علاقة ببعض
يبتدي هو بقى يلعب في الكلام ده كمان ,, فيلعب في صوته مرة يعمله رفيه مرة تخينن و هكذا يعني بيقعد يتشقلب
و يخرج هذا الميكس المقرف في صورة شيء يسمى اغنية شعبي
من المدهش انها بقت بتعجب الناس
و يندمجوا معاها
و يتجهوا للرقص عليها
اه ما هو الواحد مكبوت و لازم يطلعه في اي حاجة :D :D
و الرقص بيجمع جميع انواع الحركات البذيئة الي نفسك فيها ,, و اي تلوث بصري نفسك تشوفه موجود

الاغاني الشعبي اغلبها بيدعو على الاكتئاب ,, يعني حاول تركز في اي كلمات (ده لو سمعت كلمات ) هتلاقي كمية اكتئاب و حزن و مرض و خيانة و دموع و اهات خرافية
الطريف انك بتلاقي الناس بترقص عليها و مبسوط
مهو ياما الي عاملها مجنون ياما الي بيسمعها مجنون ؟!!
كمان مش عارف ايه فكرة انك لما تكون مكتئب تقعد تسمع اغاني كئيبة ,, انت كده هتستريح و هتبقى مبسوط يعني ؟!!
لما تبقى شايف انك مجروح و تسمع اغاني بتقولم انك مجرح و هما ميستاهلوش و خانوك و بتاع ,, هتتبسط انت كده ؟!!

و كالعادة لما بتكلم عن اي ظاهرة بتكلم عن الحل
بس للاسف فعلا الظاهرة دي انا بقف عاجز عن ايجاد اي حل لها
هي عاملة زي وباء او مرض ,, بينتشر في المجتمع ,, بقى بيسمعها من اول الطبقات الي مش لاقيه تاكل لغاية ارقى طبقات المجتمع
حتى الاطفال
احمد اخويا في ثالثة اعدادي ,, سمعني واحد زميلة في الفصل ,, نفسه قوي يبقى مطرب شعبي ,,, و منزل اغنية مهرجان او موسيقى مهرجنات , , مركب عليها اغنية بصوته
الموضوع كان مقزز و صادم جداا
الطفل الي ممكن يطلع موهبته في حاجة حلوة نفسه جدا يكون مغني شعبي
و يا ريته نافع ,,, !!!

بس الحل من وجهة نظري  ان الي معترض عالظهرة دي يظهر اعتراضه ,, متقعدش في مكان مشغل شعبي و تسكت ,, بنصح نفسي قبل ما انصحكم  متخليش االغلط يبقى عادي ,, حتى لو بقى منظرك غريب انك بتعترض على حاجة زي دي ,,, بس خليك انت راجل و قول لأ !
و الناس الي بتسمع شعبي ,, بجد و الله مش هطلب منك غير انك تسمع حاجة ليها قيمة او لازمة ,,
و ربنا يرحمنا برحمته و يتوب علينا من الهم ده

و انتظرونا في عن مجتمعنا الموقر ... 4- الشتايم
و ربنا يجعل كلامنا خفيف عليكوا
سلااام ^_^

عن البنات .. اضافة :D

كنت اتكلمت قبل كده و عبرت عن اندهاشي و استغرابي و فجاتي لني مرة شفت بنت لابسة فوسفوري ,,, كنت مندهش جداا

سامحوني على جهلي ,,, اتضح انه موضة :D :D 

اقتباس

عن مجتمعنا الموقر ,,,, 2- انت مرتبط ؟

السلام عليكم 
اولا بالنسبة للتدوينة الي فاتت 
بعتذر لو كان فيها اي كلام دايق اي حد 
انا حاولت على قد ما اقدر الكلمات ميكونش فيها حاجة خارجة او خادشة للحياء 
بس للاسف ساعتها اكتشفت قد ايه ان احنا واقعنا ومجتمعنا الي بقى خداش للحياء 
فسامحوني انا اسف و الله مرة تانية 

نيجي بقى لموضوعنا 
 انت مرتبط ؟ 
او زي ما عبدالله صاحبي  سماه ,,, الرجولةبقت  هز كتاف :P  

ظاهرة جديدة و قوية جداا في مجتمعنا  و هي ظاهرة الارتباط 
خاصة بين الشباب الجامعي 
اولا اذا حبينا نعرف الارتباط ,, , فهو طبقا لكل الاقاويل المعنى المهذب لكلمة "ماشيين مع بعض " :D 

اسبابه بتبقى غالبا ان الشاب المحترم و الانسة المهذبة "بيقولو" انهم بيحبوا بعض 
بس الظروف مش مساعده دلوقتي ,, يعني لسه بندرس و كده و مش هينفع نتقدم و كده 
فهنرتبط ,, بمعنى ؟؟ 
هنبقى كاننا مخطوبين يعني بس مش مخطوبين ,,, بنخرج مع بعض ,, بنكلم بعض في التليفون,,, قاعدين واكلين شاربين مذاكرين كل حاجة مع بعض ,,, عادي مرتبطين بقى 
هو الموضوع كان بدا ب انه طالما 
in public ,,, و مفيش feelings ,,,
so Whaaaat ?!
وبعدين الموضوع بدا يدخل فيه فيلنجس للاسف :D 
فبقى in public,,,,,,, sooo whaaat ?! 

وحاليا ,,, بقت So whaaaat ?! بس :D 

نتكلم بجد بقى شوية :D 
الناس المرتبطة دي ,,, بجد والله انا اسف بس مضطر اصدمكم :D 
ديننا الي بعتهولنا ربنا ,,, مفيش فيه حاجة اسمها ارتباط ,,, ده حتى الخطوبة حضرتك ليها معايير و شروط و حدود مينفعش تتجاوزها 
يعني مثلا وانت خاطبها مينفعش تخرجوا مع بعض لوحدكم ,,, تخيل انكم بتخرجوا و انتوا مرتبطين :D :D 
كمان  وانت خاطبها برده لسه مش حلال ليك انك تلمسها ,, هي لسه مبقتش مراتك 
تخيل بقى انك بتمسك ايديها ,,,,, و تعديها الشارع ,, , ويا سلام على حبي و حبك ^_^ 

طب ايه الي بيخلي الشباب الغلبان ده يرتبط 
قال ايه ,,, اصله خايف على حبيبته انها تضيع منه ,, ا و حد يخطبها او يجوزها و هو لسه يا عيني مجهزش نفسه 
فبيرتبط بيها ,, هو كده ربطها يعني ,, و من هنا جاء مصطلح الارتباط :D 

ده غير ان شباب كبير بيحب يتسلى و دي حقيقة ,, و بنات برده بتحب تتسلى و دي برده حقيقة 
فبيبداو يرتبطوا يتسلوا لغاية ما يزهقوا ثم فركش ,,, و يقضوا فترة الجامعه ارتباطات 
يعني في اس بترتبط مرة كل شهر 
وفي ناس اكتر و في ناس اقل ,,, ربنا يقويهم :D 
طيب  مبدايا نرجع و نقول ان موضوع الارتباط ده ديننا ميرضاش بيه و ملوش اي اصل في الدين بتاعنا 
 بيحصل فيه كثييير من الحاجات الحرام الي بتغضب ربنا ,,, و مالهاش لازمة 

 طيب حضرتك واحد مبتقتنعش بكلام ربنا و لازم كلام عقلاني يقنع سيادتك
وماله يا باشا نجيبلك كلام عقلاني 
بص ,,, الانسان مليان شهوات 
وكل مرحلة بيبقى ليها شهواات هي اكثر ما يلح على الانسان 
فمرحلتنا دي الواحد بيبقى نفسه قوي يكلم بنت وو يصا حبها و يخرج معاها و يحكيلها و يحكيله و يا سلااام بقى 
الحاجات دي حلوة وممتعه مفيش كلام ,, و الا مكانتش اتسمت شهوة 
بس ربنا حددلنا اطار نشبعها فيه و هو الزواج برده 
تخيل انت اشبعتها دلوقتي و انت مرتبط 
صدقني و الله هتخلصوا كل الكلام قبل ما تدخلوا عالخطوبة حتى :D :D 
و هتقضوا خطوبة كئيبة ,,, مهو مفيش حاجة جديدة تعملوها :D 
فهتقرروا تتجوزا بسرعه ,, مانت عايز تشبع باقي شهواتك 
و بعد الجواز و خلاص بقى جبنا عيال 
ولقيت الحوار مسئولية 
و الكلام الحلو راح 
و الحظات الحلوة بح 
و يا سلاام على حبي وحبك ,,, الشريط سف :D  
و هتبتدي بقى العيال عايزين 
و اصرف يا ابو العيال 
و هتبتدي بقى لاول مرة تتخانق معاها خناقات كتيرة 
و هتلاقي نفسك اما مبقيتش عايز منها حاجة  فهتطلقها 
او هيصعب عليك الولاد فهتستحمل و تعيشوا عيشة كئيبة عليكوا و على و لادكوا 
و هتقعد تلعن الجواز و سنينه 
السيناريو ده بيتكرر كتييييييييييير 

ده في احسن الحالات لو كملتوا و اجوزتوا يعني ,, و ده مبيحصلش غير في 20% بس من الارتباطات :D 
ده غير  انك بدات حياتك بمعصية لربنا ,,, فمستحيل هتعيش حياة سعيدة 

كمان في حاجة اشبه بارتباط بس مؤدب شوية 
بيبقوا مرتبطين ,, بس بابا و ماما لارج شوية ,, او ممكن اكس اكس رااارج ,, فعافين انهم مرتبطين ,,, و سايبينهم عادي ,,, مالولاد مصيرهم يكبروا و يخطبوا :D 
والله فكرت كتير برده في مسمى تاني للارتباط الي بعلم الاهل ده ,,, برده ملقيتلوش مسمى تاني غير مرتبطين يعني ماشيين مع بعض ,, بس بابا و ماما عارفين 
عادي يعني  متبقاش قفل كده 

طب ما الحوار سهل اهو يا جدعان ,,, خطوبة ايه بقى و حفلة ايه و جواز ايه و فرح ايه 
الواحد يدور على اي اب و ام لارج و عندهم بنت حلوة و يروح يقولهم بعد اذنك يا عموا انا عايز امشي مع بنتك لاني بحبها و لسه عيل مش قادر ادخل البيت من بابه 
فيقوله ماشي يا حبيبي ربنا يعينك ,,, امشي معاها بس باحترامك ,,, و اول ما تكون نفسك هتلاقيها مستنياك 
و يا سلاام على حبي و حبك ^_^ 


قارن بقى بواحد صبر و استحمل عشان خاطر ميغضبش ربنا 
و بالنسبة للبنت الي بيحبها فهو واثق في ربنا انه مش هيختارله حاجة و حشة و ان دايما اختيار ربنا احسن من اختياره  ,, مهو ربنا قال "الطيبون للطيبات" فهو حاول يشغل نفسه بنفسه و يكون طيب وساب الطيبات دي على ربنا ^_^ 

تخيل بقى متعته و هو بينفذ اي حاجة في الحلال ,, و in public و فيها feelings و يا سلام على حبي و حبك و الدنيا حلوة و الجو ربيع و كل الرومانسية الي نفسك فيها بقى :D 
عادي ,, الناس كلها عارفة انهم بيحبوا بعض و بيدعولهم ربنا يتمملهم على خير 
و هو لما دخل البيت دخله و هو راجل و قده 
و عارف ان البنت دي هو هيعيشها عيشة محترمة ,, مش هيشردها في الجامعه و الكافتيريات ,, او تحت الشجر يا و هيبة :D 

نفسي بجد والله اشوف حوار الارتباط ده انتهى من الوجود
بيصعبوا عليا جدااا و الله ,, بحس قمة العجز فيه ,, انت مش قادر على شهوتك ,, و مش قد دخول البيت ,,, فاخترت انك تعصي ربنا عشان خاطر انت تستمع ,,, تفتكر ربنا هيباركلك ؟!! 
ضيق افق رهييييب  

يلا ربنا يعينا و يصبرنا جميعا و يوفقنا و يثبتنا ياااارب 

وانتظرونا في عن مجتمعنا الموقر ,,,, 3- الاغاني الشعبي ^_^

وربنا يجعل كلامنا خفيف عليكم ,,, سلااام ^_^ 

عن مجتمعنا الموقر ...1- البنات

بسم الله 

اتكلمت قبل كده عن انما الام الاخلاق ما بقيت ,,, فان هم ذهبت اخلاقهم ذهبوا 
و عندما اتامل في حال مجتمعنا اليوم 

ارى انه وللاسف الشديد مجتمعنا الفاضل قد تجاوز مرحلة سوء الخلق ,,, حقيقة لا اعرف مسمى لمرحلة تلي سوء الخلق في الانحطاط 
ربما تكون سفالة ,,, ربما تكون وقاحة ,,,, لا ادري ولن تغير كثيرا في الامور تسميتها فمعظمنا يشعر بما وصلنا اليه

فنحن الان نتجرا على ما حرم الله ,,, فكل منا له "دماغه " و "كيفه" و الذي لا يسمح لاي احد ان يعترض عليه او ينتقده ,,, 
"انت مالك يا اخي انا حر "
او ربما تجد نفسك من اصحاب العقول المريض 
والانفس الحقيرة 
وشخص حقود و غيور وحشري و.....
,وبتحب تفرض عالناس رايك و تمشي الناس كلها على مزاجك انت و بس 
وانتهازا لهذه المناسبة السعيدة
و استغلال للفرص :D
ايوة حضرتك يا فندم ,,, انا اصلا شخص عقلي مريض و نفسيتي تعباني شوية ,, ادعيلي ربنا يهديني 
وكمان انا بحقد قوي على كل الي بيعملوا اي حاجة من الي هكتبها هنا لاني نفسي قوي اعملها بس مش عارف
و لو في اي اضافة جديدة تحب تضيفهها عليا عادي كلي اذان صاغية و هتقبلها منك بصدر رحب ومش هقولك حاجة والله ,,, 

و هتكلم كل فترة عن ظاهرة في مجتمعنا الموقر ,,, تجاوزت الحد و معرفش رايحين فين بعد كده ,,, ومعادش من حقك تعترض عليها ,,, لانك لو اعترض تبقى شخص مش محترم و حشري و مبتسيبش الناس في حالها 
كل مقالة هتمسك ظاهرة بتغيظني ,,, و بتغيظني لانها غلط و حرام ,,,, و لانك لما بتحاول تفهم الناس كده بيتهموك بالاتهامات الي فوق دي ,,
واسمحولي اول حاجة هتكلم عنها البنات :D 
فترى البنات يتفنن في احدث الطرق و الملابس التي تكشف و تصف جسدهن ,,, او قد يرتدين الوانا لا تعرف من العبقري الذي صمم ملابس بها 
اقسم اني رايت مرة بنت ترتدي "بلوزة" فوسفوري ,,, اه و المصحف يعني ماشية باليل تنور :D 
و كمية البنات الي بيلبسوا حاجات بكم و يشمروها لغاية ما تبقى نص كم او ممكن ربع برده
و البناطيل قاعدة بتضيق برده بصورة بقت مبالغ فيها ( بس دي بقت ولاد و بنات االشهادة لله يعني ) :D :D 

كان في مرة سمعت واحد بيقول احنا متجهين الى ظاهرة البنطولنات الرش 
الواحد او الواحده يقف كده و يترش عليه البنطلون فيلزق في جسمه ,,,لأنه مش هينفع يتلبس:D  
بس الشهادة لله ,,, كلهم بيبقوا لابسين طرحه .
وممكن برده يلبسوا باروكة (اه و الله شفتها :D  ) ,,, مش عيب ولا حرام ,, هي طالما هتداري شعرها خلاص ,, تلبس بقى شعر اختها او شعر بنت الجيران  او شعر من عند الكوافير مش هتفرق ,,,, يا سلام عالعفة !!
و كمان ساعات الطرحة بتبقى بتداري يدوبك 20% من الشعر ,,, و اهو نبقى بردوا عملنا بمنطق الستر  ,,, فطالما مش جايلها نفس تغطي شعرها كله ,,, تغطي الي تقدر عليه و ربنا غفور رحيم :D 
 والجميل بقى و الي عرفته مؤخرا ان في بنات كتير منهم عارفين ان الي هما بيلبسوه ده مش حجاب ,, طب لابسة الطرحة ليه يا حجة ,,, عشان انا مينفعش امشي من غير طرحة .

الفكرة هنا انا مش كل البنات بتتشقلب كده عشان تلفت انتباه الولاد ,لأ جزء كبيييير جداا ممنهم للاسف تربيتهم كده ,,, متربوش على ايه الصح والغلط ,,, وهي طلعت لقت مجتمعها بيعمل كده ومحدش قال ان ده غلط  والي بيقول ان ده غلط بيبقى كل اللستة الي فوق دول فاستمرت كده ,, و هتتجوز واحد راضي بيها كده ,,, هيخلفوا بنت تطلع بنفس الطريقة ,, و هكذا ,,, السلسة مستمرة الى ان يشاء الله .

وهنا نعود مرة اخرى لمجتمعنا الموقر ,فانا اذا لمت على من يقوم بهذا التصرف مرة فسالوم على من رباهم 100 الف مرة ,
الاب و الام فهموا بنتهم ان الحجاب طرحه تتلبس على الراس بس 
وممكن لما تروحي المصيف تقلعيها عادي !! :D
ممكن لو سافرتي بره تقلعيها عادي !! 
ممكن تلبسي مع الطرحه كل ما سبق !! الموضوع اختياري يعني 
ممكن تلبسيها باي لون ,,, حتى لو فسفوري !!! 
المهم انك تكوني لابسة طرحة ,,, عشان ترضي ربنا !!
ميجراش حاجة عادي :D :D 


انا مش هقعد ارغي كتير بقى و اقول البنت المفروض تلبس ايه و متلبسش ايه و الكلام ده مش بتاعي اصلا و مبفهمش فيه ,بس انا معلوماتي عن البنت المحترمة الي ديننا بيطلب مننا ان ده يكون المظهر الي في الشارع ;احنا خدناها في المدرسة في اعدادي في قصة السيدة اسماء بنت ابي بكر تقريبا لما ولدها عبدالله ابن الزبير كان بيقولها مواصفات قطعه القماش او الهدوم الي هيجيبهالها مش متذكر بالظبط يعني 
قالتله " لا يصف ,,, ولا يشف ,,, و غير ملفت " 
ثلاث كلمات صغيرين لو كل راجل علمهم لبنته ,,, و علمها ليه تلبسهم كده ,,, وايه الحكمة ,,, وايه الثواب ,,, وكل الكلام ده 
مكناش وصلنا للمرحلة الي وصلنالها دي 
تخيلوا كده مجتمعنا كل البنات الي فيه محتشمات ,,,
 ولا هيبقى فيه تحرش ,,, ولا عهر في التلفزيونات ,,, ولا مشاهد اباحية صريحه في الافلام العربي للاسف ,,,
ساعتها مجتمعنا هيلفظ اي شيء يخالف هذا النهج لوحده ,,, والي عايز ينحل هيروح ينحل في حتة تانية تقبل بانحلاله ,,, 
الحل مش في سن قوانين ولا هيئة امر بالمعروف و نهي عن المنكر تجلد الي بيلبسوا وحش ولا .... 
الحل في تربية سليمة ,,, تبدا مننا احنا جيلنا  الي حاطط فيه امل كبير ,,, ولا تنتهتي الا بالوصول الى ذروة الكمال في هذا الامر 
وللحديث بقية في الجزء الثاني 
عن مجتمعنا الموقر .... 2- انت مرتبط ؟؟ :D 

و ربنا يجعل كلامنا خفيف عليكم ,,,, سلام ^_^ 

لو لم اكن مصريا ,,,,

لو لم اكن مصريا ,, لوددت ان اكون فلسطــــينيا 
فهو شعب عنده روح ,, و عنده قيمة ,, و عنده حلم 

اما نحن ,,, فاصبح من العار عندنا ,,, ان تحلم ,,او تحس 
وياتيك الرد الاذع " عيش عيشة اهلك " 

بص ....
 ما هو انا مصيري في يوم من الايام هلاقيك ان شــــــاء الله
 
وساعتها ...... :) 

روح القاهرة ....

اكتر حاجة بتخنقني في بلدنا دي مركزيتها 
تلاقي كل الشخصيات العامة و المؤثرة و اي حد ممكن يفيدك بصورة قوية موجود في القاهرة 
طب عشان تحضرله ,, تروحله القاهرة 
طب عايز تحضر اي حاجة نضيفة ؟! روح القاهرة 
عايز تخلص مصلحة حكومية ,, روح القاهرة 
اي منحة لما بتيجي .؟ بتروح القاهرة 
الجمعية الفلكية فين ؟! في القاهرة 
هندسة طيران وفضاء فين ؟! جامعه القاهرة 
طيب انضف منح ممكن تاخدها فين ؟! الجامعه الامريكية الي في القاهرة 
طب عايز تجيب مراجع تجيب منين ؟! تنزل القاهرة 
طب عايز تشتري كتب تجيب منين ؟! انزل القاهرة 
حتى في شركات كتيرة ,,, بتشترط عليك عشان تشتغل فيها انك تكون من سكان القاهرة 
على راسهم شركة مصر للطيران 
مع اني ممكن اوصل من اسماعيلية للمطار قبل ما واحد ساكن في 6 اكتوبر  او حتى وسط البلد يوصل للمطار ,, واهو ده اسمه في القاهرة ؟!! 
لو قعدت احكي من هنا لبكرة الصبح كمية الامتيازات الي موجودة في القاهرة مش هنخلص 
ميدايقنيش ان يبقى فيه امتيازات في القاهرة 
يدايقني ان الامتيازات دي تبقى في القاهرة "بـــــــس" 

و ده خلى القاهرة مكان  زحمة و الناس الي عايشة فيها لما يجوا حتة زي اسماعيلية يعتبروها جنة !!

طيب تيجي بقى لحد من االشخصيات العامة  دول 
تقوله ممكن تيجي تطلع تقول اي حاجة بره القاهرة 
اصلي مش فاضي ,, ليه ؟! ورايا حاجات في القاهرة ؟!! 
يا عم في ناس محترمين ولاد ناس عايزين يستفيدوا منك برده بس بره القاهرة .؟! 
لا معلش اصل الناس بتوع القاهرة 
طب يا سيدي الفاضل ممكن تشرفنا في جامعه قناة السويس ؟! 
لا معلش اصلي مش فاضي 
طب ممكن تشرفنا في الجامعه الامريكية ؟! 
اه طبعا تحبوني اجيكلم امتى و فين ؟! 
طب ممكن تشرفنا في جامعه القاهرة ,,, هرتب مواعيدي و اجيلكم 
وكان طلاب الجامعات الخاصة امثال الجامعه الامريكية و خلافه دول طلاب درجة اولى و هما دول عباقرة الوطن و ذخره و هما دول الي يستحقوا يسمعوا كلامه 
و طلاب الجامعات الحكومية الي في القاهرة دول درجة ثانية بس برده طلاب محترمين وولاد ناس و هينفعوا البلد 
وطلاب الجامعات الحكومية الي في المحافظات دول بقى درجة عاشرة او 15 على حسب ما تهوى هذه الشخصية العامة تصنيفهم 
مع اني اقسم بالله بلد زي اسماعيلية فيها كفاءات و مواهب و عبقريات و مهارات لشباب في سني تضرب اي طالب في اي حتة تانية بالقديمة 
و ده  كان انطباع ناس   تطوعوا و تفضلوا وجم من القاهرة عشان يقعدوا معاهم قالوا انهم شافوا مستوى احسن من الي شافوه في اي حتة تانية 
اخرهم مسابقة فيم لاب اعترفت لجنة التحكيم فيها ان مستوى المتسابقين في جامعة قناة السويس كان اعلى من مستوى المتسابقين في جامعه القاهرة ولا ينافسه فيها الا جامعه اسكندرية ؟!




متاكد ان الكفاءات الي هتطلع من اسماعيلية و من اي محافظة تانية هتفرق كتيير جدا في تاريخ مصر في الفترة الجاية 
بس يا رب ميضطرهمش الزمن هما كمان انهم يروحوا القاهرة ؟! :S 

تدوينة كئيبة .. :)

عزيزي القاريء
لطفا اذا كنت في حالة مزاجية جيدة فلا تقرا هذه التدوينة
ففيها بعض من الكابة التي قد تخرجك بالكثير من السخط عليها و على كاتبها
ولكن اعذرني ,, فانها كآبة لا بد منها

انها عن رحلة ,, و لكنها رحلة مختلفة الى حد ما

فهي رحلة ,, الى حساب شخص متوفى !
في ظل التقدم و التكنولوجيا ,, اصبح من السهل عليك ان تتعرف الى شخص و تعرف باسلوب كلامه و تعامله و تكون انطباع عام عن شخصيته من خلال حسابه الشخصي على الفيس بوك

في الفترة الاخيرة ,,, القى القدر امامي بالعديد من حسابات الاشخاص الذين توفاهم الله
و لا اعرف ربما كانت صدفة ,,, ان يكونوا كلهم شباب ,, في نفس المرحلة العمرية !!

اخرهم هو حساب جهاد موسى فتاة جامعة المنصورة التي تم دهسها بسيارة دكتورة في الجامعه

كلما تاملت في حساب من هذه الحسابات ,, لا يسيطر علي الا معنى واحد
هل كان يعرف انه سيموت ؟
قطعا لا
و تكون هذه الاجابة هي اشد الاجابات المفزعة بالنسبة لي

و هنا انتقل الى نقطة اخرى  مخاطبا نفسي
هل تعرف انك ستموت ؟ طبعا
هل تعرف متى ستموت ؟  قطعا لا
اذا على ماذا هذه الغرور و الاماني
نعم ,,, انا اخشى لقاء ربي

فما اتيته بكثير من العمل الصالح
بل اتيته بكثير من المعاصي و الذنوب و الخطايا
استغفره و اتوب اليه عنها دائما
واساله ان يتقبل :)
الاحلام و الاماني و التخطيط لحياتنا وكاننا سنعيش مدى الدهر
و نسياني حق ربي

عارفين ,,, في ناس كده تتامل في حسابهم و في حياتهم ,,, تلاقي لسانك بينطق لا اراديا ويقول ده انسان محترم ,,, ربنا يرحمه و يغفرله و يتقبل منه و يسكنه الجنة
وتبقى فرحانله انه مات ,, اه والله ,, بتحس انه راح عند ربنا عشان ربنا يجازيه خير
مع انك ممكن متكونش تعرفه اصلاا

فرصة اقف و افكر فيها مع نفسي
حقيق انا اتغيرت
اعتقد ان جانب كبير مني اتغير للاسوا
كم اتمنى ان اكون شخصا ,, يشع طاقة ,, تفائل ,, رحمة
اتمنى ان اكون بلسما يمشى على الارض
تطيب به الجروح
ويستريح عنده المهموم
اتقرب الى الله باضحاك عباده وادخال السرور عليهم
بالا اياسهم او اقنطهم من رحمته

احاول و احاول
ولا اصل ابدا الى درجة تريحني و ترضيني
اسال الله ان يعيني و يوفقني
ويهديني الى ما فيه الخير و الصلاح
وهي فرصة لك صديقي القاريء
لا تعلم متى ستموت
فاستعد ,, لعلك تقبض قبل ان تكمل قراءة هذا المقال
اعط نفسك دقيقة بعد قراءة هذا المقال
اغمض عينيك ,, تخيل نفسك في كل فعل اغضبت به ربك
وتب اليه توبة نصوحا
استغفره و تقرب اليه ,,, و ما تقربت اليه بشيء احب اليه مما افترضه عليك :)
وراجع حسابك الشخصي على الفيس بوك
فهو عنوانك بعد وفاتك
فبعد موتك ,,, اما انه سيكون حسنة جارية لك تجني ثمارها الى ان يشاء الله
و اما انه سيكون سيئة جارية لك تعذب بسببها الى ان تموت

و تذكر ,,, ما الذي تريد ان تورثه للناس بعد موتك
فاياك ان تموت دون ان تترك بصمة في مجتمعك
ولو كانت هذه البصمة,,, هي بسمة :)